भोपालक जंगलमे एकटा कारमे भेटल ५२ किलोग्राम सोना

भोपाल
*

मध्य प्रदेशमे आयकर विभाग द्वारा चलि रहल अभियानक क्रममे राजधानी भोपालक समीप स्थित मेडोराक जंगलमे एकटा कारसँ ५२ किलोग्राम सोना बरामद कयल गेल अछि। ई पुष्टि नहि भेल अछि जे ई केकर सोना अछि आ कतयसँ आनल जा रहल छल आ कतय लऽ जाओव जा रहल छल। आयकर विभाग एखनि राज्यमे कारवाई कऽ रहल अछि। एहि सन्दर्भमे विभाग भोपाल, ग्वालियर आ इन्दौरमे बिल्डरक कतेको स्थानपर छापा मारलक अछि। एकर अतिरिक्त, परिवहन विभागक एकटा पूर्व कर्मचारीक निवास पर तलाशी अभियान चलायल गेल छल। जखन ई अभियान चलि रहल छल, राजधानी लग मेडोरा जंगल क्षेत्रमे बृहस्पति देर राति एकटा सुनसान कार भेटल। जखन एहि कारक शीशा टूटल तखन भीतर ५२ किलोग्राम सोना भेटल। खबरि अछि जे आयकर टीम पुलिसक सहयोगसँ ई अभियान चलौलक। एहि कारमे ग्वालियर पंजीयन नंबर अछि। एकर अतिरिक्त, एहि कारमे सायरन लागल अछि आ पुलिसक निशान सेहो अंकित अछि। पता चलल अछि जे एहि कारक पंजीयन एकटा महिलाक नाम पर अछि।

कारक भीतर एकटा महिलाक शॉल आ मेकअपक सामान सेहो भेटल अछि। एकर आधार पर ई सन्देह कयल जाइत अछि जे जखन कारकेँ लावारिस हालतमे छोड़ल गेल छल तखनि कोनो महिला कारमे रहल होयत। एकर अतिरिक्त, जाहि क्षेत्रमे कार भेटल छल, ओहि क्षेत्रमे वरिष्ठ अधिकारीसभक कतेको फार्महाउस अछि। उल्लेखनीय अछि जे वर्तमानमे केन्द्रीय जाँच एजेंसीसभ मध्य प्रदेशक विभिन्न भागमे अभियान चला रहल अछि। प्रवर्तन निदेशालय इन्दौरमे कांग्रेस नेता गोलू अग्निहोत्रीक निवासपर छापा मारने छल। एम्हर प्रवर्तन निदेशालय एकटा व्यापारी उमेश शाहराक ठिकान पर सेहो कारवाई कयने छल।