आ ‘मिथिलाक्षर गौरव’ सम्मानक लेल चयनित भेलथि गायत्री झा एवं प्रदीप कुमार
रुनू (आभा) मिश्राकेँ भेटत उत्कृष्ट सम्मान सहित सर्वोच्च संजीवनी सम्मान एवं कृष्ण कान्त झा सम्मानित हेताह ‘विशिष्ट सम्मानसँ
*
निज समदिया!! मिथिलाक्षरक प्रचार-प्रसारमे महत्वपूर्ण योगदान, लिखय-पढ़यमे प्रवीणता एवं अभियानमे उत्तम मार्गदर्शन आदिक लेल मिथिलाक्षर साक्षरता अभियानक ‘मिथिलाक्षर गौरव’ सम्मानक दोसर चरणमे दुईटा अभियानी क्रमशः संरक्षिका गायत्री झा ३५/६३ एवं संरक्षक प्रदीप कुमार ९२ दिनांक १५-१२-२०२५ केँ ‘मिथिलाक्षर गौरव’ सम्मानक लेल चयनित भेलथि। जनतबक अनुसार १२म मिथिलाक्षर साक्षरता सम्मान समारोह जे राँचीमे २८ दिसम्बर २०२५ केँ होबयवाला अछि, ताहिमे ई लोकनि सम्मानित हेथिन।
प्राप्त जानकारीक अनुसार एहिसँ पहिलुक ‘मिथिलाक्षर गौरव’क लेल घोषित अभियानी जे पहिलुक समारोहमे उपस्थित नहिं भऽ सकल छलथि, मुदा राँचीक एहि समारोहमे उपस्थित भऽ रहल छथि, से सभ सेहो एहि सम्मानसँ सम्मानित हेथिन, ताहिमे क्रमशः संरक्षिका बीणा झा २६/९९, संरक्षिका माधुरी झा ६४/११२, उत्कृष्ट संरक्षिका अनीता झा ०८/१८/०८, उत्कृष्ट संरक्षिका रिंकू झा २१/३०/०८, उत्कृष्ट संरक्षिका उमा झा २३/३०/०८ एवं संजीवनी उत्कृष्ट वरिष्ठ संरक्षिका रुनू (आभा) मिश्रा ०१/प्रथम/०२ सम्मिलित छथि।
विशेष जनतब जे मिथिलाक्षर साक्षरता अभियानक स्त्री वर्गक मुख्य संचालिका संजीवनी उत्कृष्ट वरिष्ठ संरक्षिका रुनू (आभा) मिश्रा ०१/प्रथम/०२ पिछला कतेको सम्मान समारोहमे उपस्थित नहिं भऽ सकल छलीह। अभियानमे हिनकर अद्भुत योगदान अछि, फलतः हिनका नहिं मात्र पंचतारांकित उत्कृष्ट सम्मान बल्कि छः तारांकित ‘संजीवनी सम्मान’ धरि प्राप्त अछि, जे अभियानक सर्वोच्च सम्मान अछि। राँचीक सम्मान समारोहमे हिनकर उपस्थितक कारण हिनका घोषित उत्कृष्ट सम्मान आ संजीवनी सम्मान भेटत।
तहिना अभियानमे पुरुष वर्गमे अपन अद्भुत योगदानक बदौलत सर्वोच्च छः तारांकित संजीवनी सम्मान धरि प्राप्त करयवाला संजीवनी उत्कृष्ट वरिष्ठ संरक्षक कृष्ण कान्त झा ०८/०८/०५ सेहो प्रायः सभ समारोहक भाँति राँचीक एहि समारोहमे उपस्थित रहताह आ हिनका ‘विशिष्ट सम्मान’सँ सम्मानित करय केर निर्णय लेल गेल अछि।
