मिथिलाक बेटी तथा सुप्रसिद्ध अन्तरराष्ट्रीय ख्यातिप्राप्त गायिका मैथिली ठाकुरकें मुंबई आगमन पर अंतरराष्ट्रीय विमानतल पर नवी मुम्बई मैथिल ट्रस्ट केर पदाधिकारीगण द्वारा स्वागत कयल गेल। मिथिलाक पारम्परिक परम्पराक द्योतक पाग एवम् पुष्प-गुच्छ द्वारा ट्रस्टक सचिव मुरारी ठाकुर अपन अनन्य वरिष्ठ सहयोगी कृष्ण कुमार झा ‘किसुनजी’, राजन झा, अवधेश मिश्र समेत अन्यक उपस्थितिमे स्वागत कयल गेल।
जनतब दी जे मुम्बईक एकटा प्रतिष्ठित सामाजिक संगठन “मिथिला नवजीवन समिति ट्रस्ट, उल्लासनगर, अपन स्थापनाक पचासम वर्षक उपलक्ष्यमे त्रि-दिवसीय स्वर्ण जयंतीक भव्य आयोजन सरस्वती मंदिर परिसरक विशाल प्राङ्गनमे कयने अछि। स्वर्ण जयंती समारोहक उपलक्ष्यमे मैथिल ठाकुर द्वारा भव्य सांस्कृतिक कार्यक्रमक प्रस्तुति दिनांक ०३ फरवरीकेँ भेल। नवी मुंबई मैथिल ट्रस्ट, सुप्रसिद्ध गायिका सुश्री मैथिली ठाकुरके मुम्बई आगमनक अवसर पर स्वागत करैत आह्लादित अछि। मैथिल ठाकुर एवम् हिनक पिताजी रमेश ठाकुर एहेन भव्य स्वागतसँ अभिभूत होइत प्रसन्नता व्यक्त कयलनि।
