भारतसँ तुर्की आ अजरबैजान लेल वीजा आवेदनमे 42 प्रतिशतक तीव्र गिरावट दर्ज कएल गेल अछि। ई जनतब मंगलकेँ आयल एकटा रिपोर्टमे देल गेल। हालिया भारत-पाक संघर्षमे दुनू देश सार्वजनिक रूपसँ पाकिस्तानक लेल अपन समर्थन व्यक्त कएलक, जकरा चलते भारतीय दिसिसँ एहेन प्रतिक्रिया भेटि रहल अछि।
वीजा प्रोसेसिंग प्लेटफार्म एटलिससँ उपलब्ध आंकड़ा अनुसार, केवल 36 घंटाक भीतर, वीजा आवेदन प्रक्रियाकेँ बीचमे छोड़निहार यूजरक संख्यामे 60 प्रतिशतक वृद्धि भेल अछि।
एटलिसक संस्थापक आओर सीईओ मोहक नाहटा कहलनि, “प्रतिक्रिया तीव्र आ व्यवहारिक छल। लोककेँ किछु गंतव्यसँ बचबाक लेल कहबाक आवश्यकता नहि छल। ओ सहज ज्ञान, जानकारी आ विकल्पसभ तक पहुँचय केर आधार पर आगाँ बढ़लथि। ई आधुनिक यात्राकेँ देखाबैत अछि।” ओ कहलनि, “एहि भावनामे हम भारत संग ठाढ़ भऽ आ राष्ट्रीय भावना एवं एकता देखाबैत तुर्की आ अजरबैजान लेल सब मार्केटिंग प्रयाससभकेँ सेहो रोकि देलहुँ।”
दिल्ली आ मुंबई जेना महानगर सभसँ आबि रहल यात्री सभ तुर्की जाए लेल आवेदनमे 53 प्रतिशतक गिरावट दर्ज कएल गेल, जखनिकि इंदौर आ जयपुर जेना टियर 2 शहरसँ आबि रहल यात्री सभक रुचि ज्यादा मजबूत रहल, जे केवल 20 प्रतिशत कम भेल। यात्रा योजनाकेँ पुनर्विचार करनिहार यात्रीक प्रकृतिमे सेहो बदलाव आयल। पारिवारिक यात्रा सहित समूह वीजा अनुरोधमे लगभग 49 प्रतिशतक गिरावट आ सोलो एवं कपल अनुरोधमे 27 प्रतिशतक गिरावट देखल गेल।
एहीसँ पता चलैत अछि जे ग्रुप ट्रैवलर्स, जे प्रायः पहिनेसँ योजना बनबैत छथि आ राजनीतिक भावनासभक प्रति अधिक संवेदनशील होइत छथि, व्यक्तिगत यात्रीक तुलनामे अधिक निर्णायक रूपसँ प्रतिक्रिया करैत छथि। एटलिस डेटा उम्र आ इरादाक बारेमे प्रारंभिक संकेत सेहो प्रकट केलक। 25 सँ 34 वर्षक उम्रक यात्री जल्दीसँ अपन रास्ता बदलबाक संभावना सबसँ बेसी छल, जे तुर्कीक लेल मिड-प्रोसेस एप्लिकेशन गिरावटमे 70 प्रतिशतसँ अधिकक योगदान देलनि। दिलचस्प बात इ अछि जे महिला यात्रीक गंतव्यकेँ पूर्ण रूपसँ बदलबाक संभावना बेसी छल। आंकड़ा सभसँ पता चलल जे एकर बादमे वियतनाम, इंडोनेशिया आ मिस्रक लेल आवेदनमे 31 प्रतिशत धरि वृद्धि भेल।
