स्थानीय विधायक प्रो० विनय कुमार चौधरी कहलनि जे बेनीपुर विधानसभा क्षेत्र विकासक मामिलामे प्रदेशमे अव्वल साबित होयत । सभ आधारभूत संरचना मजबूत कयलाक बाद उद्योग आ रोजगार दिसि बिहार अपन डेग बढ़ा चुकल अछि जाहिमे आब आर तेजी आनल जायत । विधायक प्रो० चौधरी बेनीपुर प्रखंडक बेलौन चौकसँ बेलौन बघ्घी टोल धरि मुख्यमंत्री सड़क अनुरक्षण योजना अंतर्गत सड़क निर्माण काजक आधारशिला राखैत ई बात कहलन्हि ।
एहि दौरान ओ कहलनि जे बेनीपुर विधानसभा क्षेत्रमे वर्तमान वित्तीय वर्षमे चारि दर्जनसँ बेसी ग्रामीण सड़कक नवीकरण कार्य पूरा कऽ लेल गेल अछि आ किछु निर्माणाधीन अछि । शेष बाँचल ग्रामीण सड़क सभक सेहो अगिला वित्तीय वर्ष धरि पूरा कऽ लेल जायत । आगू प्रो० चौधरी कहलनि जे पथ निर्माण विभागक अधीनस्थ सभ प्रमुख सड़कक कायाकल्प कऽ देल गेल अछि जाहिमे बहेड़ा – झंझारपुर , बहेड़ा – बहेड़ी , बहेड़ा – सकरी , बेनीपुर – सुपौल – कुशेश्वरस्थान , बेनीपुर – दरभंगा सड़कक काज द्रुत गतिसँ चलि रहल अछि जखनकि बेनीपुर – महिनाम – बिशनपुर आ नाइरबान्ह – मृतुजापुर पथ केर स्वीकृति विभाग द्वारा भेट गेल अछि जाहि पर अविलंब काज प्रारंभ कयल जायत।
विधायक प्रो० चौधरी स्वास्थ्यक क्षेत्रमे आमूलचूल परिवर्तनक बात करैत कहलनि जे बेनीपूर अनुमंडल अस्पतालमे २९ चिकित्सकक पदस्थापनाक संग- संग सभ मूलभूत सुविधा उपलब्ध करा देल गेल अछि । प्राथमिक स्वास्थ्य केंद्र बहेड़ा केर अपग्रेड करैत सामुदायिक स्वास्थ्य केंद्रमे परिवर्तित कऽ देल गेल अछि। एकरा लेल निविदाक प्रक्रिया सेहो संपन्न भऽ चुकल अछि आ जल्दिये निर्माण काज प्रारंभ कऽ देल जायत। विधायक श्री चौधरी शिक्षा, स्वास्थ्य, बिजली, पेयजलमे आमूल चूल परिवर्तनक बात बताबैत कहलनि जे आब सभ खेतक पानिक दिशामे सरकार अग्रसर अछि। अलगसँ कृषि फिडर बनाकय सभ खेत केर बिजली पहुँचा कय सिंचाई केर सुविधा सुलभ कयल जा रहल अछि ।
एहि दौरान ओ उपस्थित जनसमूहकेँ दीपावली आ छठि पाबनिक शुभकामना देलन्हि ।एहि अवसर पर मुखियागण अनुरुद्ध कमती, संतोष कुमार, कुमुद कुमार, पप्पू सिंह आदि उपस्थित छलाह ।
