स्थानीय विधायक प्रोफेसर विनय कुमार चौधरी कहलन्हि जे बेनीपुर विधानसभा क्षेत्र विकास योजना सबहक क्रियान्वयनमे बिहारमे अव्वल साबित भऽ रहल अछि । खासकय पथ निर्माणक मामिलामे सभ टोल , मोहल्ला आ बसावटकें मुख्य सड़कसं जोड़ैत यातायात केर सर्व सुलभ बनायल गेल अछि, जेना की बिहारक मुख्यमंत्री नीतीश कुमारक विजन छल सभ टोल बसावटकेँ मुख्य सड़कसं जोड़ैत राजधानी पटना केर यात्रा 6 घंटाक भीतर पूरा कयल जा सकय।
विधायक प्रो० चौधरी बहेड़ी नगर पंचायतक दूगो अलग-अलग सड़क सह नाला निर्माणक आधारशिला राखैत ई बात कहलन्हि । एहि दौरान ओ कहलनि जे पथ निर्माण विभागक अधीनस्थ सभ सड़कक नवीनीकरण आ दोहरीकरण काज लगभग पूरा कयल जा चुकल अछि । बहेड़ी आ बेनीपुर दुनु बाईपास सड़कक निर्माण तेज गतिसं जारी अछि जखनकि ग्रामीण कार्य विभाग द्वारा चारि दर्जनसं बेसी ग्रामीण सड़कक निर्माण कयल जा चुकल अछि आर दू दर्जनसं बेसी सड़कक निर्माण प्रक्रिया निविदाक प्रक्रियाधीन अछि । स्थानीय निकाय केर स्तरसं सेहो छोट – छोट सड़क सभ केर पीसीसीमे परिवर्तित कय मुख्य सड़कसं जोड़बाक काज लगभग पूरा कयल जा चुकल अछि । एहि केर संगहि पूर्वमे बनल सड़क सबहक अनुरक्षण कार्य सेहो द्रुत गतिसं कयल जा रहल अछि ।
ओ कहलनि जे विकासक मामिलामे ई विधानसभा क्षेत्रमे शिक्षा , स्वास्थ्य , बिजली , पानी , सिंचाई सुविधा केर संग – संग सभ मूलभूत आवश्यकता केर पूरा कयल जा रहल अछि । एहि दौरान ओ सड़क निर्माण काजमे गुणवत्ताक विशेष ख्याल राखबाक निर्देश दैत कहलनि जे समय सीमा केर अंदर गुणवत्तापूर्ण काज पूरा कयलासं सरकारी योजनाक समुचित लाभ आम लोककेँ भेट पाओत एहि लेल समय सीमा आ गुणवत्ता दुनु केर ख्याल राखबाक चाही । एकर दायित्व सभ जनप्रतिनिधि केर बनैत अछि जे एकर सतत निगरानी कयल जाय । ओ जनप्रतिनिधि सभसं अपील करैत कहलनि जे आम लोकक सेवा हमरा सबहक मूल भावना हेबाक चाही जाहिमे कोनो तरहक जाइत वर्ग वा समुदाय केर विभेद नहि हेबाक चाही । खासकय विकासक मामिलामे तऽ कोनो तरहक भेदभाव वा राजनीति नहियेटा हेबाक चाही।
मौका पर नगर पंचायतक मुख्य पार्षद मनोज लालदेव , राजू चौधरी , बुडको कार्यपालक अभियंता अभय कुमार , डिप्टी प्रोजेक्ट मैनेजर राकेश कुमार , नगर पंचायतक कार्यपालक पदाधिकारी आशीष कुमार , राम शंकर सिंह , डॉ० सत्येंद्र मोहन मिश्रा , शैलेन्द्र चौधरी , मनीष कुमार , संतोष शाह , मनन ठाकुर , फूल कुमारी देवी , धीरज मुखिया , बैजनाथ मंडल , सुधीर ठाकुर , दीपक कुमार सहित सैकड़ो लोक मौजूद छलाह।
