वरीय अधिवक्ता व्यवहार न्यायालय मधुबनीक संजय कुमार मिश्र प्रेस विज्ञप्ति जारी कय कहलनि अछि कि एससी एसटी मामिलाक स्पेशल जज जिला एवं अपर सत्र न्यायाधीश एस एफ एम बनी केर अदालत बेनीपट्टीक जेल अधीक्षककेँ ‘कारण बताउ’ नोटिस जारी कयलनि अछि।
हरलाखी थानामे दर्ज एकटा मामिला थाना कांड संख्या २१४/२५ मे बेनीपट्टी जेलमे कैद भरत साफीक तरफसँ अर्जी दाखिल कऽ अधिवक्ता संजय कुमार मिश्र कारा अधिक्षक पर कानूनक अनदेखी कय वकालतनामा एवं आवेदन पर बंदीक हस्ताक्षर नहिं लेबाक आरोप लगौने छलथि।
ओ कोर्टकेँ बतौलनि कि भरत साफी हरलाखी थानामे दर्ज दोसर मामिलामे सूचक अछि। ओहि मोकदमामे प्रोटेस्ट दाखिल करबा लेल आवेदन एवं वकालतनामा पर भरत साफीक हस्ताक्षर जरुरी अछि। आवेदन एवं वकालतनामा लऽ कऽ पैरवीकार बेनीपट्टी कारा गेल तऽ जेल अधीक्षक हस्ताक्षर कराबयसँ मना कय देलक।जानकारीक मोताबिक भरत साफीक तरफसँ दाखिल अर्जी पर सुनवाईक बाद न्यायालय बेनीपट्टी कारा अधीक्षकसँ स्पष्टीकरणक मांग कयलक अछि। आगामी २० अगस्तकेँ कोर्ट कारा अधीक्षककेँ सदेह उपस्थित होयबाक आदेश सेहो जारी कयलक अछि।
