सीएम साइंस कॉलेजमे बीसीए कोर्स लेल एआईसीटीईसँ फेर भेटल मान्यता
दरभंगा समदिया
*
तीन वर्षीय पाठ्यक्रममे नामांकन लेल आवेदन 5 सँ होयत प्रारंभ।
सीएम साइंस कॉलेजमे स्ववित्त पोषित योजना अंतर्गत तीन वर्षीय बीसीए पाठ्यक्रम लेल अखिल भारतीय तकनीकी शिक्षा परिषद (एआईसीटीई) सँ शुक्रदिन मान्यता भेटला बाद सत्र 2025-28 मे नामांकन लेल प्रक्रिया प्रारंभ क’ देल गेल अछि। एहि सत्रमे नामांकन लेल 05 मईसँ आवेदन जमा लेल जायत।
पाठ्यक्रम संचालन लेल गठित सलाहकार समितिक शुक्रदिन भेल बैसारमे सर्वसम्मतिसँ ई निर्णय लेल गेल। प्रधानाचार्य सह पाठयक्रम निदेशक प्रो दिलीप कुमार चौधरीक अध्यक्षतामे आयोजित बैसारमे पाठ्यक्रम संयोजक डा अभिषेक शेखर, बर्सर डा यूके दास, डा योगेश्वर साह, डा सुजीत कुमार चौधरी, डा अजय कुमार ठाकुर, डा बीडी त्रिपाठी आ पाठ्यक्रम सहायक अभिषेक कुमार शामिल भेलाह।
बैसारमे सर्वसम्मतिसँ सीबीसीएस पाठ्यक्रम पर आधारित एहि तीन वर्षीय पाठ्यक्रममे नामांकन लेल आवेदनक प्रक्रिया 05 मईसँ प्रारंभ कयल जयबा पर सहमति बनल। जखनकि आवेदनक अंतिम तिथि 21 मई निर्धारित कयल गेल। बैसारमे जून मासक दोसर सप्ताहमे लिखित आ मौखिक परीक्षा केर आधार पर मेधा सूची तैयार क’ नामांकन प्रक्रिया पूरा क’ लेबा आ जुलाई मासक पहिल सप्ताहसँ एकर वर्ग संचालन शुरू क’ देबाक निर्णय लेल गेल। आवेदन ऑफलाइन मोडमे महाविद्यालयक स्नातक काउंटर पर जमा लेल जायत।
