भारत-नेपाल सीमासँ सटल किशनगंज जिलामे बांग्लादेशी घुसपैठीक लेल नकली आधार कार्ड तैयार करय वाला गिरोहक पुलिस भंडाफोड़ कयलक अछि। जिलाक जियापोखरि थाना क्षेत्रक गिलहा बारी गाममे छापेमारीक दौरान एक व्यक्तिकेँ गिरफ्तार कयल गेल, जखनि कि दू टा आरोपी मौकासँ भागि गेल।
मामिलासँ जुड़ल सबूत आ बरामदगीक बाद स्थानीय स्तरसँ लsकs सुरक्षा एजेंसी तकमे चिंता आ सतर्कताक माहौल अछि।
पुलिस अधीक्षक सागर कुमार शनिदिन दुपहरियामे पत्रकार सम्मेलनमे एहि कारवाई केर जानकारी देलथि। ओ कहलनि जे, ई पूरा कारवाई गुप्त सूचनाक आधार पर कयल गेल अछि। जियापोखर थाना प्रमुख विकास कुमारक नेतृत्वमे टीम मालिंनगावके अशरफुल (पिता मो. कुड्डस) के घर पर छापा मारलक, जतयसँ अशरफुल गिरफ्तार कयल गेल। मुदा जमाल आ पंकज नामक दूटा आओर आरोपी मौकासँ भागि गेल, पुलिस टीम ओकर खोजमे लगातार छापा मारि रहल अछि।
छापामारीक दौरान पुलिस प्रिंटर, आई स्कैनर, फिंगर स्कैनर, नकली मोहर, दू टा मोबाइल फोन, नेपाली आ भारतीय सिम कार्ड, एकटा चारपहिया वाहन आ नेपाली मुद्रा जब्त कयलक अछि। बरामद भेल चारि पहिया गाड़ीमे पश्चिम बंगालक नंबर अछि, जाहि कारण एहि पूरा रैकेटक बंगाल कनेक्शनक जांच सेहो शुरू भs गेल अछि।
पुलिसक अनुसार ई गिरोह भारतीय नागरिक बताबयवाला बांग्लादेशी घुसपैठिकेँ फर्जी आधार कार्ड उपलब्ध कराबैत छल ताकि सरकारी सुविधा लेल पहिचान पत्रक दुरुपयोग कs सकय। ई कारवाई सीमावर्ती क्षेत्रमे सुरक्षा व्यवस्थाकेँ बारेमे नव चिंता पैदा कs रहल अछि, कियेकि ई मामिला खाली एगो गाम वा एक जिला तक सीमित नहिं लगैत अछि।
पुलिस अधीक्षक जानकारी देलनि जे एहि मामिलामे वाहन मालिक सहित चारि गोटेकेँ खिलाफ प्राथमिकी दर्ज कयल गेल अछि। संगहि मौकासँ जकर नाम आओर कागजात भेटल अछि ओकर घर पर छापामारी कएल जा रहल अछि आओर ओकर नागरिकतासँ जुड़ल दस्तावेजक जांच कएल जा रहल अछि. प्रारंभिक जांचक आधार पर ई मानल जा रहल अछि कि ई एगो संगठित नेटवर्कक हिस्सा भs सकैत अछि, जकर जड़ि कतेको राज्य आ संभवतः अन्य देशमे सेहो पसरल भs सकैत अछि।
