बांग्लादेशक एकटा अदालत पूर्व प्रधानमन्त्री शेख हसीनाक विरुद्ध दोसर गिरफ्तारी वारंट जारी कयलक अछि। एहि बेर जबरदस्ती लापता कयल गेल लोकक मामिलामे हुनकर कथित भूमिकाक लेल वारंट जारी कयल गेल अछि।मानवताक विरुद्ध अपराधक आरोपमे ७७ वर्षीय हसीनाक विरुद्ध गिरफ्तारी वारंट पहिनेसँ जारी कयल जा चुकल अछि।
छात्र विरोधक कारण उत्पन्न आक्रोशक बाद हसीना पछिला साल अगस्तमे सत्ता छोड़ि भारत आबय लेल विवश भऽ गेल छलीह। समाचार एजेंसीक रिपोर्टक अनुसार घरेलू अंतर्राष्ट्रीय अपराध न्यायाधिकरण (आईसीटी) केर मुख्य अभियोजक ताजुल इस्लाम कहलनि जे दोसर वारंट हुनकर शासनकालक दौरान जबरन लापता लोकसभसँ संबंधित अछि। आरोप अछि जे बांग्लादेशी सुरक्षाकर्मी कथित रूपसँ ५०० सँ बेसी लोकक अपहरण कयलक, जाहिमेसँ किछु गोटे कतेको सालसँ गुप्त ठिकानामे नजरबन्द छलाह। अदालत शेख हसीना आ हुनकर सैन्य सलाहकार, सैन्य कर्मी आ अन्य कानून प्रवर्तन अधिकारी सहित ११ अन्यकेँ खिलाफ वारंट जारी कयलक अछि।
अंतरिम सरकार हसीनाक प्रत्यर्पण आ मुकदमाकेँ एकटा पैघ मुद्दा बना रहल अछि।
समाचार एजेंसीक रिपोर्टक अनुसार, मुख्य सलाहकारक प्रेस सचिव शफीकुल आलम रविदिन एकटा संवाददाता सम्मेलनक दौरान जोर देलखिन कि हसीनाकेँ “मानवताक खिलाफ अपराध” केर लेल न्यायक सामना करय केर चाही।
बांग्लादेशक अंतरिम सरकार हालेमे भारत सरकारकेँ एकटा कूटनीतिक नोट पठौलक, जाहिमे देशक पूर्व प्रधानमन्त्री शेख हसीनाक प्रत्यर्पणक माँग कयल गेल। अंतरिम सरकारी विदेश मामिलाक सलाहकार तौहीद हुसैन २३ दिसंबरकेँ ढाकामे कहलनि, “हम भारतकेँ सूचित कयलहुँ अछि आ न्यायिक उद्देश्यक लेल शेख हसीनाक वापसीक अनुरोध कयलहुँ अछि। एकर सूचना एकटा नोट वर्बेल (कूटनीतिक नोट)क माध्यमसँ देल जाइत अछि।”
