बांग्लादेशक अंतर्राष्ट्रीय अपराध न्यायाधिकरण (आईसीटी) बृहस्पतिकेँ बांग्लादेशक पूर्व प्रधानमन्त्री शेख हसीना आ अवामी लीगक ४५ प्रमुख नेताक विरुद्ध गिरफ्तारी वारंट जारी कयलक। रिपोर्टक अनुसार, जुलाई-अगस्तमे विद्रोहक दौरान मानवताक विरुद्ध कयल गेल कथित अपराधक लेल वारंट जारी कयल गेल अछि।
अभियोजन पक्ष द्वारा न्यायाधिकरणमे दूटा याचिका दायर कयलाक बाद ई फैसला आयल, जाहिमे हुनकालोकनिक विरुद्ध गिरफ्तारी वारंटक माँग कयल गेल छल। मुख्य अभियोजक मोहम्मद ताजुल इस्लाम कहलनि जे न्यायाधिकरण सम्बन्धित अधिकारीसभकेँ शेख हसीना आ अन्य ४५ अभियुक्तकेँ गिरफ्तार कऽ १८ नवम्बरसँ पहिने अदालतमे पेश करबाक निर्देश देलक अछि।
वारंट सूचीमे पूर्व मंत्री ओबैदुल कादर, असदुज्जमान खान कमाल, हसन महमूद आ अनिसुल हक सन पैघ नाम सेहो शामिल अछि। विद्रोहक अवधिमे हुनकालोकनिक विरुद्ध मानवताक विरुद्ध अपराध आ नरसंहारक ६०सँ बेसी शिकायत दर्ज कयल गेल अछि।आईसीटीक जांच एजेंसी आ अभियोजन टीम एहि शिकायतक जाँच शुरू कऽ देलक अछि।
सरकार अन्तर्राष्ट्रीय अपराध (अधिकरण) अधिनियम, १९७३मे संशोधन करबाक लेल एकटा मसौदा सेहो तैयार कऽ रहल अछि। मुख्य अभियोजक ताजुल इस्लाम मीडियाकेँ कहलनि जे शेख हसीना आ अन्य फरार अभियुक्तसभकेँ वापिस अनबाक प्रयास कयल जायत जे एखन विदेशमे छथि।
