केंद्रीय सूचना एवं प्रसारण मंत्रालय शुक्रकेँ सभ मीडिया चैनलकेँ रक्षा अभियानक लाइव कवरेजक लेल एडवाइजरी जारी कयलक। ओ रक्षा अभियान आ सुरक्षा बल सभक गतिविधिकेँ लाइव कवरेजसँ बचबाक हिदायत देलक अछि।
केंद्रीय सूचना आ प्रसारण मंत्रालय द्वारा आदेशमे कहल गेल अछि, “सभ मीडिया चैनल सभकेँ रक्षा अभियान आ सुरक्षा बल सभक आवाजाहीक लाइव कवरेज देखाबयसँ परहेज करबाक सलाह देल जाइत अछि। राष्ट्रिय सुरक्षाक हितमे सभ मीडिया प्लेटफॉर्म, समाचार एजेंसी आ सोशल मीडिया यूजर्ससँ निवेदन अछि जे ओ सभ रक्षा आ अन्य सुरक्षा संबंधी अभियान केर रिपोर्टिंग करबाक समय अत्यंत जिम्मेदारी बरतय आ मौजूद कानून आ नियम सभक कड़ाईसँ पालन करय।”
आगू आदेशमे कहल गेल अछि की, “विशेष रूपसँ रक्षा अभियान आ सुरक्षा बल सभक गतिविधिसँ संबंधित रीयल-टाइम कवरेज, विजुअल केर प्रसार वा स्रोत आधारित जानकारी केर रिपोर्टिंग नहि करबाक चाही। संवेदनशील जानकारी केर समय पूर्व खुलासा अनजानेमे शत्रु तत्व सभक मदति कऽ सकैत अछि आ अभियान केर प्रभावशीलता आ कर्मी सभक सुरक्षाकेँ खतरामे डालि सकैत अछि।
पिछला घटनासभ जिम्मेदार रिपोर्टिंग केर महत्त्वकेँ रेखांकित करैत अछि। कारगिल युद्ध, मुंबई आतंकी हमला (26/11) आ कंधार अपहरण जेकाँ मामिला सभमे अनियंत्रित कवरेजसँ राष्ट्रीय हित पर प्रभाव पड़ल छल। मीडिया, डिजिटल प्लेटफॉर्म आ व्यक्ति राष्ट्रीय सुरक्षाक रक्षामे महत्वपूर्ण भूमिका निभबैत अछि। कानूनी दायित्व सभक अतिरिक्त, ई हमरा सभक साझा नैतिक उत्तरदायित्व अछि जे हमर सभक काज अभियान वा हमर सेनासभक सुरक्षाकेँ खतरामे नहि डालय।”
एहि आदेशमे कहल गेल अछि जे सूचना आ प्रसारण मंत्रालय पहिने सभ टीवी चैनल सभकेँ केबल टेलीविजन नेटवर्क (संशोधन) नियम, 2021 केर नियम 6(1)(पी) केर पालन करबाक लेल परामर्श जारी कए चुकल अछि। नियम 6(1)(पी) मे कहल गेल अछि जे केबल सेवामे कोनो कार्यक्रम प्रसारित नहि कएल जायत, जाहिमे सुरक्षा बल सभ द्वारा आतंकवाद विरोधी अभियानक लाइव कवरेज होय, एहेन मीडिया कवरेज केवल उपयुक्त सरकार द्वारा नामित अधिकारीक द्वारा समय-समय पर देल गेल जानकारी धरि सीमित होयत, जा धरि ओ अभियान समाप्त नहि भ जाए।
“ऐहन प्रसारण केबल टेलीविजन नेटवर्क (संशोधन) नियम, 2021 केर उल्लंघन अछि आ एकर तहत कार्यवाही कएल जा सकैत अछि। ताहि लेल, सभ टीवी चैनल सभकेँ सलाह देल जा रहल अछि जे ओ राष्ट्रीय सुरक्षा केर हितमे आतंकवाद विरोधी अभियान आ सुरक्षा बलक गतिविधिक लाइव कवरेज प्रसारित नहिं करथि। सभ हितधारक सभसँ निवेदन अछि जे कवरेजमे सतर्कता, संवेदनशीलता आ जिम्मेदारी बरतल जाय आ राष्ट्रक सेवामे उच्चतम मानकक पालन करय। ई आदेश मंत्रालय केर सक्षम प्राधिकृतिक अनुमोदन संग जारी कएल गेल अछि।” रक्षा मंत्रालय अपन एक्स खाता पर ई आदेश साझा करैत अपील कएलक अछि। ओ एक्स पर लिखलक, “सभ मीडिया चैनल, डिजिटल प्लेटफॉर्म आ व्यक्तिसभसँ निवेदन अछि जे ओ रक्षा अभियान आ सुरक्षा बलक गतिविधिक लाइव कवरेज वा रीयल-टाइम रिपोर्टिंगसँ बचथि। एहन संवेदनशील वा स्रोत-आधारित जानकारीक खुलासा केर कारण अभियान खतरामे पड़ि सकैत अछि आ लोकक जीवन पर जोखिम आबि सकैत अछि।”
