रविकेँ पाकिस्तानक क्वेटासँ ताफ्तान जा रहल एकटा सैन्य काफिला पर आतंकवादी हमला भेल। एहि हमलामे पाकिस्तानक आधिकारिक बयानक अनुसार सात सैनिक मारल गेल, जखन कि २१ घायल भेल। मुदा, बलूच लिबरेशन आर्मी (बीएलए) दावा कयलक जे ९० पाकिस्तानी सैनिक मारल गेल अछि।
पुलिस कहलक जे रविकेँ अशांत दक्षिण-पश्चिमी पाकिस्तानमे सुरक्षा बलकेँ लऽ जा रहल एकटा बस लग सड़कक कातमे बम विस्फोट भेल। स्थानीय पुलिस प्रमुख जफर जमनानी कहलनि जे ई हमला बलूचिस्तानक एकटा जिला नौशकीमे भेल। ओ कहलनि जे विस्फोट एकटा आओर बसकेँ सेहो बुरी तरह क्षतिग्रस्त कऽ देलक। मृत आ घायलसभकेँ लगक अस्पताल लऽ जायल गेल अछि।काफिलामे सातटा बस छल जे तफ्तान (ईरानी सीमा) जा रहल छल। नौशकीमे विस्फोटकसँ भरल एकटा कार एकटा बसकेँ टक्कर मारि देलक।
जनतब जे विस्फोटमे आठ बसमेसँ एकटा बस पूर्ण रूपसँ नष्ट भऽ गेल आ बादमे एकटा आओर बसकेँ बलूच विद्रोही घेरि लेलक आ बसमे सवार सभटा सैन्यकर्मीकेँ मारि देलक।
ई हमला प्रतिबंधित बीएलए द्वारा कयल गेल वृद्धिक श्रृंखलाक हिस्सा अछि, जे किछु दिन पहिने लगभग ४०० यात्रीकेँ लऽ जा रहल एकटा ट्रेनकेँ अपहरण कऽ लेने छल। सुरक्षा बल द्वारा जवाबी हमला शुरू करबासँ पहिने आतंकवादी लगभग ३० बंधककेँ मारि देने छल, जाहिमे सभटा ३३ हमलावर मारल गेल।
तेल आ खनिजसँ समृद्ध बलूचिस्तान पाकिस्तानक सबसँ पैघ आ सबसँ कम जनसंख्यावला प्रांत अछि। जातीय बलूचक निवासी बहुत दिनसँ केन्द्र सरकारपर भेदभावक आरोप लगबैत आबि रहल अछि, जाहि आरोपसँ इस्लामाबाद इनकार करैत अछि। बलूच लिबरेशन आर्मी पाकिस्तान केंद्र सरकारसँ स्वतंत्रताक माँग कऽ रहल अछि।
