हर हर महादेव आ जय बाबा सिद्धेश्वर नाथक जयकारा सँ गुंजयमान रहल मंदिर परिसर।
मनीगाछी प्रखंड अंतर्गत पंचायत राज टटुआर केर बिशौल गाममे अवस्थित प्राचीन सिद्धेश्वर नाथ महादेव मंदिरमे पहिल सोमवारीकेँ भक्तक भारी भीड़ जुटल। दू दर्जनसँ बेसी कमरथुआ जतय पैदल आ विभिन्न वाहनसँ सिमरियासँ गंगा जल आनि बाबा सिद्धेश्वरनाथक जलाभिषेक कयलनि। ओतहि गामक बच्चा, बूढ़, जवान आ महिला साँझ धरि शिवपूजनमे मगन रहलथि। गामक युवक लोकनि द्वारा आयोजित भव्य रूद्राभिषेक अनुष्ठान आ भजन संध्याक आयोजन भक्तक विशेष आकर्षणक केन्द्रमे रहल।
मंदिर प्रबंधन समितिक अध्यक्ष प्रो जीवकांत मिश्र बतेलनि जे हालांकि विकराल गर्मी आ प्रचंड रौद केर कारण आइ अपेक्षाकृत कम काँवड़ बाबाकें चढ़लनि मुदा आगाँ एहिमे अप्रत्याशित वृद्धि केर पूरजोर संभावना अछि। ओ कहलनि जे साओन केर पहिल सोम आयुष्मान आ सौभाग्य योगमे पड़बाक कारण ग्रामीण आ पड़ोसी गामक शिव भक्त केर उत्साह देखैत बनैत छल। हर-हर महादेव आ जय बाबा सिद्धेश्वरनाथ केर जयकारासँ मंदिर परिसर आ लगपासक इलाका दिनभरि गुंजयमान रहल। शिवभक्त लोकनि उत्तम चौघड़िया मुहूर्त आ अभिजीत मुहूर्तमे शिव पूजन आ जलाभिषेक कयलनि। शिव पूजन लेल लाभकारी मानल जाय बला शिववास योग बनबाक कारण सेहो भक्त लोकनिक उत्साह चरम पर छल, तें भीषण गर्मी आ प्रचंड रौद केर सेहो बच्चा, बूढ, जवान आ महिला कोनो परवाह नहि कयलनि।
ओ बतेलनि जे बाबा सिद्धेश्वरनाथ महादेव केर महिमा एहि इलाकामे खूब प्रसिद्ध अछि। भक्तक मानब अछि जे निर्मल मनसँ बाबा सिद्धेश्वर नाथक दरबारमे हाजिरी लगोनिहार केर मनोकामना निश्चित सिद्ध होइत अछि। भक्त लोकनिक सुविधा लेल कमेटीक सदस्य आ किछु युवा भोरेसँ सक्रिय रहथि आ भीड़केँ नियंत्रित करबा लेल मंदिर परिसरमे बैरिकेटिंग कयल गेल।
