दिल्लीमे विधानसभा सत्र काल्हि शुरू भेल। एम्हर सदनमे विपक्षक नेता आतिशी भाजपा सरकार पर गंभीर आरोप लगओलनि अछि। ओ दावा कयलनि जे विधानसभामे मुख्यमंत्री कार्यालयसँ बाबा साहेब आ भगत सिंहक फोटो हटा देल गेल अछि। आम आदमी पार्टी भाजपाकेँ दलित विरोधी करार देलक अछि।
आम आदमी पार्टीक नेता आतिशी कहलनि जे भाजपाक दलित विरोधी मानसिकता सर्वविदित अछि। आइ भाजपा राष्ट्रक समक्ष अपन वास्तविक मानसिकताक प्रमाण प्रस्तुत कयलक अछि। दिल्ली सरकार हर कार्यालयमे बाबा साहेब आ भगत सिंह’क फोटो रखबाक निर्णय लेने छल। तीन मास पहिने बाबा साहेब आ भगत सिंहक फोटो लगाओल गेल छल। ओ सभ विधानसभामे मुख्यमंत्री कार्यालयसँ बाबा साहेब आ भगत सिंहक फोटो हटा देलनि।
एम्हर आम आदमी पार्टीक राष्ट्रीय संयोजक अरविंद केजरीवाल ट्वीट कयलनि, “दिल्लीक नव भाजपा सरकार बाबा साहेबक फोटो हटा देलक अछि आ ओकर स्थान पर प्रधानमंत्री मोदीक फोटो लगा देलक अछि। ई सही नहि अछि। एहिसँ बाबा साहेबक लाखो अनुयायीकेँ ठेस पहुँचल अछि। भाजपा’सँ हमर निवेदन अछि जे अहाँ प्रधानमंत्रीक फोटो लगा सकैत छी, मुदा बाबा साहेबक फोटो नहि हटाउ।”
हालाँकि किछु समय बाद दिल्लीक मुख्यमंत्री एहि आरोपकेँ खंडन करैत कहलनि जे ओ (आप पार्टी) अपन भ्रष्टाचारकेँ बाबा साहेब आ भगत सिंहक फोटोक पाछू नुकयबाक असफल प्रयास कय रहल छथि। मीडियासँ बात करैत ओ कहलनि जे आहाँ सभ अपने देख लियौ। मुख्यमंत्री कार्यालयसँ कार्यालयक फोटो जारी कयल गेल जाहिमे बाबा साहेब आ भगत सिंहक फोटो कार्यालयमे लागल छल।
