समाजवादी पार्टीक विधायक अबू आजमी औरंगजेबक बयान पर स्पष्टीकरण दैत कहलनि जे हमर बात तोड़ि-मरोड़ कऽ पेश कयल गेल अछि। ओ सोशल मीडिया प्लेटफॉर्म एक्स पर लिखलनि, “हमर बातकेँ तोड़ि-मरोड़ि कऽ पेश कयल गेल अछि। हम औरंगजेब रहमतुल्लाह अलेहक विषयमे कहलहुँ जे इतिहासकार आ लेखक सभ कहैत छथि। हम छत्रपति शिवाजी महाराज, संभाजी महाराज वा आन कोनो महान व्यक्तित्वक खिलाफ कोनो अपमानजनक टिप्पणी नहि कयलहुँ। मुदा, तइयो जँ कियो एहिसँ आहत होइत अछि तखन हम अपन शब्द, अपन बयान वापस लऽ लैत छी।”
ओ कहलनि, “एकरा राजनीतिक मुद्दा बनाओल जा रहल अछि आ एहि कारणेँ महाराष्ट्र विधानसभाक बजट सत्र बन्द भेलासँ हमरा लगैत अछि जे ई महाराष्ट्रक जनताक लेल क्षति अछि”।
अबू आजमी एकटा वीडियो सन्देशमे कहलनि, “औरंगजेबक विषयमे हम जे टिप्पणी कयलहुँ ओ इतिहासकारसभकेँ पढ़लाक बाद कयल गेल छल। हमर कथन विकृत कए देल गेल अछि। हम कोनो महान व्यक्तित्वकेँ अपमान नहि करलहुँ। हम छत्रपति शिवाजी महाराज, संभाजी महाराज, ज्योतिराव फुले आ डॉ. बी.आर. अम्बेडकरक सम्मान करैत छी। ई महान व्यक्तित्व समाजक सभ वर्गकेँ समान दर्जा देलनि। जँ केकरो लगैत अछि जे हम गलत बाजल छी तखनि हम अपन बयान वापिस लऽ लैत छी। हम मानैत छी जे विधानसभा सत्र जारी रहबाक चाही। एहि मामिलामे जनताक काजमे कोनो रुकावट नहि होयबाक चाही।
एहिसँ पहिने सोमदिन सपा नेता अबू आजमी मुगल शासक औरंगजेबक प्रशंसा कयलनि। तहियासँ देशमे बयानक लहर शुरू भऽ गेल अछि। जनतब जे अबू आजमी कहने छलथि, “औरंगजेब न्यायी राजा छल। हुनक शासनकालमे भारत सोनाकेँ चिड़िया बनि गेल। हम औरंगजेबकेँ क्रूर शासक नहि मानैत छी। औरंगजेबक समयमे ई शासनक लड़ाई छल, धर्मक नहि, हिन्दू आ मुसलमानक बीच लड़ाई नहि। औरंगजेब अपन शासनकालमे बहुत रास हिन्दू मन्दिरक निर्माण कयलक। औरंगजेबक बारेमे एकटा झूठ इतिहास प्रस्तुत कयल जा रहल अछि।”
