श्रीराम जन्मभूमि मंदिर बनलाक बाद आब जिलाक सुरक्षा व्यवस्था कड़ा कयल जा रहल अछि। केंद्र सरकार आब एतय एनएसजी कमांडो इकाई स्थापित करबाक तैयारी कऽ रहल अछि जाहि लेल जमीनक खोज कयल जा रहल अछि। केंद्र सरकार द्वारा एहि निर्णयपर मुहर लगलाक बाद एनएसजीक ब्लैक कैट कमांडो एतय तैनात रहत।
एखन धरि जिलामे दूटा केन्द्रीय सुरक्षा एजेंसी आ राज्य सरकारक चारिटा सुरक्षा एजेंसी तैनात कयल गेल अछि। कोनो वीवीआईपी यात्रापर दिल्लीसँ एनएसजी कमांडोकेँ बजाओल जाइत अछि। राम मन्दिरक निर्माणक बाद जिलामे प्रायः वीवीआईपी भ्रमण होइत रहैत अछि संगहि सभ समय भक्तलोकनिक भारी भीड़ रहैत अछि।
समय-समय पर अयोध्या सेहो आतंकवादीक निशानापर रहल अछि, जकरा देखैत आब एतय सुरक्षा कड़ा कयल जा रहल अछि। एकरा लेल भविष्यमे एतय एनएसजी कमांडोक एकटा इकाई स्थापित करबाक तैयारी अछि।
सूत्रक अनुसार, एनएसजीक टीम जिला प्रशासनसँ सम्पर्क कयलक अछि आ हुनका सभसँ जमीन चिन्हित कऽ उपलब्ध करयबाक लेल कहलक अछि। जाहि पर तेजीसँ काज कएल जा रहल अछि। ओतहि, पुलिस महानिरीक्षक प्रवीण कुमार कहलनि कि अयोध्यामे एनएसजी यूनिट खुजय केर सूचना तऽ अछि, मुदा पूरा जानकारी हुनका नहिं अछि।
