आम आदमी पार्टीक नेता आतिशी मुख्यमंत्री पदक इस्तीफा देबाक लेल ‘राज निवास’ पहुँचलीह। ‘राज निवास’ राष्ट्रीय राजधानीक उप-राज्यपालक आधिकारिक निवास अछि। वर्तमानमे एतय उपराज्यपाल वीके सक्सेना रहैत छथि। आतिशी उपराज्यपालकेँ अपन इस्तीफा सौंपि देलनि आ एही संग ओ दिल्लीक पूर्व मुख्यमंत्री बनि गेलथि।
8 फरवरीकेँ घोषित विधानसभा चुनावक परिणाममे आतिशीक पार्टीकेँ करारी पराजयक सामना करय पड़ल। मुदा, जँ हुनकर पार्टी जीतैत तँ हुनकर इस्तीफा तखनो भऽ सकैत छल। किएक तँ 21 सितम्बर, 2024केँ जहिना ओ मुख्यमंत्रीक शपथ लेलनि आ आतिशी स्पष्ट कऽ देलनि जे ओ अल्पकालिक मुख्यमन्त्री छथि।
ओ कहने छलीह जे मुख्यमंत्री बनबाक हुनकर उद्देश्य अरविंद केजरीवालकेँ फेरसँ मुख्यमंत्री बनायब अछि। आतिशी एहि चुनावमे अपन सीट जितलीह, मुदा केजरीवालकेँ फेरसँ मुख्यमंत्री बनयबाक हुनकर उद्देश्य पूरा नहि भऽ सकल। अपन कालकाजी सीट जीतलाक बाद किछु समय लेल ओ खुशीसँ झूमय लगलीह जाहि कारण सोशल मीडिया पर लोक कहय लागल जे पार्टी आ पार्टीक मुखिया हारि गेल आ आतिशी खुशी मना रहल छथि।
चुनाव प्रचारक दौरान अरविन्द केजरीवालसँ सेहो एहि मामिलाक संबंधमे सवाल पूछल गेल छल। ओ इहो स्पष्ट कयलनि जे आतिशी थोड़ेक समयक लेल मुख्यमन्त्री छथि।
2020क दिल्ली चुनावमे आम आदमी पार्टी 62 सीट जीतलक, मुदा एहि बेर ओ घटि कऽ 22 सीट पर आबि गेल अछि। भाजपा 48 सीटक संग सरकार बनाओत।
