तेज रफ्तार कार स्कूलसँ घुरि रहल छात्राकेँ पीचि देलक, मौका पर मृत्यु

दरभंगा समदिया
*

दरभंगा-बहेडी राज्य राजमार्ग पर सनखेरहा गामक समीप एकटा तेज रफ्तार अनियंत्रित कार स्कूलसँ लौटि रहल छात्राकेँ पीचि देलक। तकर बाद ओ ओहि ठामसँ भागि गेल। एहि सड़क दुर्घटनामे लड़कीक मौका पर मृत्यु भs गेल। मृतक लड़कीक पहिचान अमर सदाक पुत्री प्रीति कुमारी (8)क रूपमे कयल गेल अछि।

एहि घटनाक बाद परिवारक लोकक संग आक्रोशित ग्रामीण दरभंगा-बहेरी मुख्य सड़क केर जाम कs देलक।
पूरा घटनाक जानकारी भेटैत देरी बहेरी थाना मौका पर पहुँचि गेल। लोककेँ मनेलाक बाद शवके पोस्टमार्टमक लेल डीएमसीएच भेज देल गेल।

एम्हर जहिना घटनाक खबरि भेटल तहिना मृतक लड़कीक घरमे कोहराम मचि गेल। आक्रोशित लोक सड़क जाम कs पीड़ित परिवारक लेल मुआवजाक मांग कs रहल छलथि।

जानकारीक अनुसार अमर सदाक पुत्री प्रीति कुमारी सनखेरहा स्थित स्कूलमे पढ़ाईक बाद बच्चा सबहक संग घर वापिस आबि रहल छलथि। एहि दौरान बहेरीसँ दरभंगा दिसि आबि रहल एकटा तेज रफ्तार गाड़ी लड़कीकेँ टक्कर मारि कs भागि गेल। एहि दुर्घटनामे लड़कीक मौका पर मृत्यु भs गेल। किछु प्रत्यक्षदर्शी किछु दूर धरि गाड़ीक पीछा कयलक, मुदा गाड़ीमे सवार लोक कोनो तरहे भागि गेल। घटनाक सूचना भेटलाक बाद मृतकक परिवारक लोक कानि रहल छथि। कहल जा रहल अछि जे लड़की पहिने अपन नानीक घरमे रहैत छल।

बहेरीक थानाध्यक्ष वरुण कुमार गोस्वामी कहलनि जे, घटनाक जानकारी भेटैत देरी शवकेँ पोस्टमार्टमक लेल पठा देल गेल। संगहि ओ कहलनि जे, पोस्टमार्टम रिपोर्ट अयलाक बाद सहयोगक राशि देल जायत। एहि इलाकामे लागल सीसीटीवी कैमराक फुटेजक जांच कs गाड़ीक पता लगाओल जा रहल अछि।