मानसूनक जल्दी आगमन आ लगातार भारी बारिशक कारण भारतीय मौसम विभाग (आईएमडी) राज्य लेल रेड अलर्ट जारी कऽ देलक अछि। महानगरीय गुवाहाटी सहित राज्यक बहुतो भागमे ई स्थिति ‘जल कर्फ्यू’ जकाँ भ’ गेल अछि, कारण बरखा आ पानिक कारणे लोक घरमे बंद रहय पर मजबूर भऽ गेल अछि।
लगातार भेल भारी वर्षाक कारण गुवाहाटी सहित पूरा राज्यमे बाढ़िक चेतावनी जारी कएल गेल अछि। बंगालक उत्तर-पश्चिमी खाड़ी पर गहींर दबाबक वजहसँ आईएमडी असम लेल रेड अलर्ट जारी कऽ देने अछि। असम आ अन्य पूर्वोत्तर राज्यमे मानसूनक बारिश शुरू होय केर संग-संग घुबड़ी, गोआलपारा, कोकराझार, हैलाकांडी, कछार आ दीमा हसाओ जिलामे अत्यंत भारी बारिश आ तेज हवाक चेतावनी देल गेल अछि जकर रफ्तार 40 सँ 60 किलोमीटर प्रति घंटाक रफ्तारसँ चलि सकैत अछि।
आईएमडी एहि इलाकामे अचानक बाढि, जलभराव, गाछ खसब, भूस्खलन आ बिजली कटौतीक खतराक सेहो चेतावनी देलक अछि। असम राज्य आपदा प्रबंधन प्राधिकरण (एएएसडीएमएए) एकरासँ पहिने एकटा बयान जारी कय कऽ चेतौनी देलक अछि कि लगातार भारी बारिशसँ बाढ़िक स्थिति आओर बढ़ि सकैत अछि आ यातायातमे बाधा आबि सकैत अछि। संवेदनशील क्षेत्रमे गाछ खसय आ भूस्खलनक संभावना बढ़ि सकैत अछि।
एएसडीएमए केर अनुसार गुवाहाटी महानगरक स्थिति आओर खराब भऽ सकैत अछि आओर आपातकालीन प्रतिक्रिया टीम हाई अलर्ट पर अछि। निवासी सभसँ सावधानी बरतय लेल आग्रह कयल गेल अछि। ब्रह्मपुत्र नदी पर एखन बारीकीसँ नजरि राखल जा रहल अछि। हालांकि ई एखनो खतराक स्तरसं नीचा अछि। सोशल मीडिया पर गुवाहाटी निवासीक फोटो आ वीडियोक बाढ़ि आबि गेल अछि जे तत्काल बुनियादी ढांचाक उन्नयन आ बेर-बेर आबय वाला आपदाकेँ रोकय लेल कड़ा नियम बनेबाक मांग करैत अछि। बाढ़िक जोखिम केर कम करय लेल टिकाऊ शहरी नियोजन, पहाड़ी कटाई पर रोक आ आर्द्रभूमिक संरक्षणक आह्वान कयल गेल अछि।
गुवाहाटी क्षेत्रीय मौसम केंद्रक अनुसार अगिला तीन-चारि दिन तक असमक संग-संग गुवाहाटीक विभिन्न क्षेत्रमे बरखा होयत, मुदा एहि बेर जून महीनामे असम आ पूर्वोत्तरमे वर्षा राष्ट्रीय स्तर पर पहिनेसँ कम होबय केर संभावना अछि।
क्षेत्रीय मौसम केंद्रक अनुसार भारतीय मौसम विभाग द्वारा हालमे देल गेल जानकारीक अनुसार एहि बेर बरसातक मौसममे (1 जून सँ 30 सितम्बर) देश भरिक अधिकांश स्थान पर सामान्यसँ बेसी वर्षा होयत, हालांकि पूरा पूर्वोत्तर क्षेत्रमे कम वर्षा होयत। दक्षिण-पश्चिम मानसून मौसमक प्रभावमे एहि बेर देशमे 106 प्रतिशत वर्षाक उम्मीद अछि, हालांकि मौसम विभागक अनुसार असम सहित पूर्वोत्तर क्षेत्रमे वर्षा मात्र 94 प्रतिशत होयत। ध्यान देबय वाला बात ई अछि कि जून महीनामे सेहो असम सहित पूर्वोत्तरमे कम बारिश होयत।
लगातार बरसातक कारण राज्यक जलविद्युत परियोजनामे पानिक दबाव बढ़ल अछि, जाहि कारण ओहि बांधसँ पानि छोड़लाक कारण निचला इलाकामे भारी बाढ़िक संभावना बढ़ि गेल अछि। जानकारीक अनुसार पानिक दबाव बढ़लाक कारण दीमा हसाओक उमरंगसो आ नीपको बांधसँ पानि छोड़ल गेल अछि। नदीक हालत देखि नदीक कातमे रहय वाला लोक चिंतित भऽ गेल अछि। दोसर दिसि मौसम विभागक कहब अछि जे जून महीनामे पूर्वोत्तरमे अधिकतम तापमान सामान्यसँ बेसी होएत। विभागक अनुसार 1 मार्चसँ 27 मई तक असममे सामान्यसँ 17 प्रतिशत कम बरखा भेल अछि। एहि बेर पूरा पूर्वोत्तरमे मानसूनक प्रवेश भऽ चुकल अछि, मुदा बरसातक मौसममे कम बरखाक पूर्वानुमान कृषि प्रधान राज्यक लेल चेतावनीक संकेत देलक अछि।
ओडिशा तटक उत्तर-पश्चिमी बंगालक खाड़ी पर न्यूनतम दबावक कारण आबयवाला 2-3 दिनमे असमक किछु हिस्सामे भारी बारिशक संभावना अछि। गुवाहाटी सहित असमक ऊपरी आ पश्चिमी जिला प्रभावित होयबाक संभावना अछि। असम राज्य आपदा प्रबंधन प्राधिकरण सभ गोटेसँ आग्रह कयलक अछि जे हर समय सतर्क रहू आ सरकारी सलाहक पालन करू।
