जहिना दूधमे पानि आ चीनी घुलि जाइत अछि तहिना राजस्थानक लोक सेहो असममे पूर्ण रूपसँ घुलि-मिलि गेल अछि। एहिना हेबाक चाही किएक तँ संस्कार सेहो इहे सिखाबैत अछि । राज्यपाल लक्ष्मण प्रसाद आचार्य ई बात गुवाहाटी केर आईटीए सेंटरमे राजस्थान दिवसक अवसर पर आयोजित एकटा सांस्कृतिक कार्यक्रमक दौरान कहलनि।
राज्यपाल कहला जे असम आ राजस्थानमे बहुत समानता अछि। जहिना राजस्थानमे मीराक भक्ति अछि तहिना असममे श्रीमंत शंकरदेव आ माधवदेव सन महापुरुष छथि । ओ कहलनि जे जाहि तरहे जन्मदिवस आ गृहप्रवेश आदि मनाओल जाइत अछि ताहि तरहे देशक विभिन्न प्रांतक दिवस सेहो मनाओल जाइत अछि।
ओ कहलनि जे जतय लोग जन्म लैत अछि ओहि स्थानक प्रति लगाव बढ़ि जाइत छैक। ओ कहलनि जे एहि तरहक आयोजन कयलासँ राज्यक गौरव आ भूतकालक पहचान जानबाक मौका भेटैत अछि। एहन आयोजन अपन मातृभूमि आ संस्कृति सँ जोड़ैत रहैत अछि। एहि उद्देश्यक संग प्रधानमंत्री नरेंद्र मोदीक आह्वान पर हर राज्यक स्थापना दिवस मनाओल जा रहल अछि , जे एक भारत, श्रेष्ठ भारतकेँ दर्शाबैत अछि।
असमक कला आ संस्कृति आओर विकासमे योगदान देबयवाला राजस्थानक सपूतक चित्रक सामने दीप प्रज्वलित कय कऽ समारोहक उद्घाटन काएल गेल। एहि अवसर पर राज्यपालक संग राज्यक कतेको अधिकारी आ प्रथम महिला कुमुद देवी सहित प्रमुख उद्योगपति मौजूद छलाह। एहि अवसर पर मंच पर बैसल राज्यपाल सहित सब अतिथिकेँ पारंपरिक राजस्थानी दुपट्टा आ साफा आओर शाल भेंट कऽ सम्मानित कएल गेल।
