मतदाता सूचीक विशेष संशोधन पर बजैत रविदिन राजद नेता तेजस्वी यादव मीडिया सूत्रकेँ मूत्र कहि देलनि। ओ कहलनि मतदाता सूचीमे नेपाल, बांग्लादेश आ म्यांमारक लोकक नाम दर्ज कएल गेल अछि एकर की प्रमाण अछि। ? कोनो स्रोतके उद्धृत करैत एतेक पैघ बात कोना कहल जा सकैत अछि ? “हम सभ एहन सूत्रकेँ मूत्र मानैत छी”। ओ काल्हि धरि अपन बयान पर ठाढ़ छलथि। राजद नेता तेजस्वी यादव अपन कथनकेँ जायज ठहरौलनि
सोमदिन पटनामे मीडियाक सवालक जवाब दैत ओ कहलनि जे, “हर बेर हमरा खंडन जारी करय पड़ैत अछि आ माफी मांगय पड़ैत अछि। ताहि लेल जँ ‘सूत्र’केँ ‘मूत्र’ नहि कहब तॅ की कहब ?” संगहि ओ भाजपाकेँ निशाना बना कहलनि जे इ लोक कहियो शिक्षा, बेरोजगारी आ पलायनक गप नहि करैत छथि। हुनका लोकनिक एकटा बाबा पेशाब पीबाक गप्प करैत छथि, एहीसँ शुद्धि होयत ?
असलमे निर्वाचन आयोग कहलक जे मतदाता सूचीक विशेष संशोधनक दौरान नेपाल, बांग्लादेश आ म्यांमारक लोकक नाम मतदाता सूचीमे शामिल हेबाक संभावना अछि। निर्वाचन आयोग सूत्रक हवालासँ ई बात कहने छल। एकर जवाबमे तेजस्वी कहने छलाह जे “की चुनाव आयोगसँ कोनो प्रेस नोट आयल अछि ? कोनो दस्तावेज जारी भेल अछि ? इ खबर कतयसँ आयल अछि ?” सूत्र ई कहि रहल अछि। ई सब वैह सूत्र अछि जे पाकिस्तान पर कब्जा कयने छल।
तेजस्वी यादव इहो कहने छलाह जे निर्वाचन आयोगकेँ स्वयं आगू एबाक बदला सूत्रक आधार पर समाचार चला रहल अछि। ई ओ सूत्र छै जे ऑपरेशन सिंदूरक दौरान लाहौर, कराची आ इस्लामाबाद पर कब्जा कय लेने छल। हम सब एहन सूत्रकेँ मूत्र जकां मानैत छी जे गंध पसारैत अछि।” एहि बयानकेँ देश भरिक एनडीएक नेता कड़ा निंदा कयलनि।
