रक्षामंत्री राजनाथ सिंह बुधदिन कहलनि जे केन्द्रक मोदी सरकार बिना कोनो गोली चलेने सबसँ पैघ बाधा ‘अनुच्छेद ३७०’केँ हटा कऽ जम्मू-कश्मीरक देशमे पूर्ण विलय कऽ लेलक अछि। ई सब हितधारककेँ ध्यानमे राखि पूर्ण सुरक्षाक संग शांतिपूर्वक कयल गेल अछि।
राजनाथ सिंह दिल्लीमे आयोजित मेजर बॉब खाथिंग मेमोरियल कार्यक्रमक दौरान कहलनि जे सरकार प्रशासनिक सुधार पर ध्यान केन्द्रित कऽ रहल अछि। ‘न्यूनतम सरकार, अधिकतम शासन’ आ ‘सुशासन’क माध्यमसँ जनता आ सरकारक बीचक अन्तरकेँ कम कयल गेल अछि।
ओ कहलनि जे मेजर बॉब खाथिंग बिना कोनो गोली चलयने तवांगकेँ सफलतापूर्वक भारतमे कुशलतापूर्वक शामिल कयलनि। ओ तवांगक एकीकरण, विकास आ पुनर्निर्माणमे मेजर खथिंगक भूमिकाक सराहना कयलनि संगहि सम्पूर्ण पूर्वोत्तर क्षेत्रक सेहो प्रशंसा करैत कहलनि जे ओ पूर्वोत्तरक लेल जे कयलनि ओ राष्ट्रीय स्तर पर सरदार वल्लभभाई पटेल द्वारा कयल गेल काजक समान अछि।
रक्षामंत्री कहलनि जे सरकारक विदेश नीति मेजर खथिंग सन व्यक्तित्वक कूटनीतिक कौशल पर आधारित अछि। आइ भारत बहुध्रुवीय दुनियामे प्रचलित अनिश्चितताक बीच अपन ‘कठोर शक्ति आ नरम शक्ति’क बीच सन्तुलन कायम रखैत अछि। ई बहुत गर्वक बात अछि जे भारत अपन वैश्विक स्थितिकेँ मजबूत कयलक अछि। दुनियाक सोझाँ एकटा नव, मजगूत आ संगठित भारत उभरल अछि।
एकटा समय छल जखनि अंतर्राष्ट्रीय मंच पर भारतकेँ गम्भीरतासँ नहि लेल जाइत छल, मुदा आइ जखनि हम बजैत छी तखनि दुनिया सुनैत अछि। ई मेजर खथिंगक आदर्शसँ प्रेरित अछि।
राजनाथ सिंह २०४७ धरि ‘विकसित भारत’क निर्माणक लेल संगठित रहबाक आवश्यकतापर जोर देलनि। देशक विकास यात्रामे पूर्वोत्तरक भूमिकाकेँ स्वीकार करैत ओ कहलनि जे सरकार सदैव एहि क्षेत्रक विकासकेँ प्राथमिकता देलक अछि। एहिमे १३,००० फीटक ऊँचाई पर बनल सेला सुरंग सन बुनियादी ढाँचा परियोजना शामिल अछि, जे असमक तेजपुरकेँ अरुणाचल प्रदेशक तवांगसँ जोड़ैत अछि। एकर अतिरिक्त, अरुणाचल सीमांत राजमार्गक उद्घाटन सम्पूर्ण पूर्वोत्तर क्षेत्रमे, विशेष रूपसँ सीमावर्ती क्षेत्रसभमे, सम्पर्क बढ़यबामे महत्वपूर्ण भूमिका निभाओत। लगभग दू हजार किलोमीटर नमगर ई राजमार्ग भारतक लेल रणनीतिक आ आर्थिक सम्पत्तिक रूपमे काज करत।
ओ उल्लेख कयलनि जे सरकार द्वारा शुरू कयल गेल विकास परियोजनाक परिणाम अछि जे पूर्वोत्तर विकासक पथ पर तेजीसँ आगू बढ़ि रहल अछि आ हिंसक घटनामे उल्लेखनीय कमी आयल अछि। ओ न्यूयॉर्क टाइम्स द्वारा जारी ‘२०२५ मे घुमबाक लेल ५२ स्थान’ सूचीक उल्लेख कयलनि, जाहिमे असम चारिम स्थान पर छल।
मेजर कथींगकेँ भारतक महान सपूत बताबैत रक्षामंत्री कहलनि जे युद्धक मैदानमे अपन बहादुरी आ कूटनीतिमे कौशलक माध्यमसँ ओ देशक इतिहासमे एकटा अमिट छाप छोड़लनि। एहेन महान व्यक्तित्वक आदर्श आ सिद्धान्तकेँ अपनयब जनताक दायित्व अछि।
एहि कार्यक्रममे अरुणाचल प्रदेशक मुख्यमंत्री पेमा खांडू, सेना प्रमुख जनरल उपेन्द्र द्विवेदी, एयर चीफ मार्शल ए.पी. सिंह, असम राइफल्सक महानिदेशक लेफ्टिनेंट जनरल विकास लखेरा, आ यूनाइटेड सर्विस इंस्टीट्यूशन ऑफ इंडियाक महानिदेशक मेजर जनरल बी.के. शर्मा (सेवानिवृत्त) उपस्थित छलाह।
