प्रधानमंत्री नरेन्द्र मोदी १२ मार्चसँ दू दिनक राजस्थान दौरा पर छथि। एहि अवधिमे ओ पोखरणमे त्रि-सेवा लाइव फायर आ युद्ध अभ्यासक रूपमे स्वदेशी रक्षा क्षमताक तालमेलमे प्रदर्शित ‘भारत शक्ति’ देखि रहल छथि। ओ जैसलमेरक पोखरण फील्ड फायरिंग रेंजमे ३० सँ बेसी देशक प्रतिनिधिक सङ्ग ‘भारत शक्ति’ अभ्यास देखि रहल छथि।
ई एकटा मल्टी-डोमेन ऑपरेशनक प्रदर्शन अछि जे जमीन, हवा, समुद्र, साइबर आ अन्तरिक्ष क्षेत्रमे खतराक मुकाबला करबाक लेल भारतीय सशस्त्र सेनाक एकीकृत परिचालन क्षमताकेँ प्रदर्शित करैत अछि। एहि अभ्यासमे भाग लेबयवला प्रमुख उपकरण आ हथियार प्रणालीमे टी-९० (आईएम) टैंक, धनुष आ सारंग गन सिस्टम, आकाश हथियार सिस्टम, लाॅजिस्टिक ड्रोन, रोबोटिक म्यूल्स, एडवांस हल्का हेलीकॉप्टर (एएलएच) आ मानव रहित हवाई वाहनक एकटा श्रृंखला सम्मिलित अछि।
भारतीय नौसेना समूद्री ताकत आ तकनीकी परिष्कारकेँ उजागर करैत नौसेना एंटी-शिप मिसाइल, स्वायत्त कार्गो लऽ जायवाला हवाई वाहन आ व्यय योग्य हवाई लक्ष्यक प्रदर्शन कयलक। ई आयोजन भारतीय सशस्त्र सेनाक शक्ति आ परिचालन कौशल आ स्वदेशी रक्षा उद्योगक चातुर्य आ प्रतिबद्धताक प्रदर्शन करैत रक्षामे आत्मनिर्भरताक दिशामे देशक मजबूत प्रगतिक उदाहरण अछि।
एहि दौरान पीएम मोदी अपन संबोधनमे कहलनि, आइ हम जे दृश्य देखलहुं, तीनू सेनाक ताकत देखलौंह, आकाशमे गर्जन आ चारु दिशामे गूंजैत नव भारतक आह्वान अछि। आइ हमर पोखरण भारतक आत्मनिर्भरता आ भारतक गौरवक एहि त्रिवेणीक साक्षी बनल। एकर गूंज मात्र भारतमे नहि अपितु पूरा दुनियामे सुनल जा रहल अछि। साथीगण, विकसित भारतक कल्पना आत्मनिर्भर भारतक बिना संभव नहिं अछि। विकसित होयबाक लेल दोसरपर निर्भरताकेँ कम करय पड़त।
