प्रधानमंत्री नरेन्द्र मोदी ‘ऑपरेशन सिन्दूर’ पर नजरि राखि रहल छथि। शनिकेँ ओ एहि सम्बन्धमे एकटा महत्वपूर्ण बैसारक नेतृत्व कयलनि।
रक्षामंत्री राजनाथ सिंह, राष्ट्रीय सुरक्षा सलाहकार अजित डोभाल, चीफ ऑफ डिफेंस स्टाफ जनरल अनिल चौहान, एयर चीफ मार्शल एपी सिंह, सेना प्रमुख जनरल उपेन्द्र द्विवेदी आ नौसेना प्रमुख एडमिरल दिनेश कुमार त्रिपाठी सहित अन्य लोक बैसारमे भाग लेलनि।
ई बैसार एहेन समयमे भेल जखनि भारत पाकिस्तानक ड्रोन हमलाकेँ पूर्ण रूपसँ विफल कऽ देलक अछि। मानल जाइत अछि जे प्रधानमंत्री मोदीकेँ पाकिस्तान द्वारा कयल गेल हमला, भारतीय सेनाक जवाबी कारवाई आ एहि अवधिमे सैन्य तैयारीक पूर्ण जानकारी देल गेल अछि।
प्रधानमंत्री हर घटनाक्रम पर लगातार नजरि राखि रहल छथि। पछिला २४ घंटामे सेना प्रमुख आ रक्षा मंत्री राजनाथ सिंहक सङ्ग प्रधानमंत्री मोदीक ई दोसर महत्वपूर्ण बैसार अछि। प्रधानमंत्री शुक्रदिन एहने बैसारक अध्यक्षता कयने छलाह।
एहिसँ पहिने ‘ऑपरेशन सिंदूर’ पर विदेश मंत्रालय आ रक्षा मंत्रालय शनिकेँ संयुक्त प्रेस कॉन्फ्रेंस कयलक। पाकिस्तान संग चलि रहल तनाव पर सैन्य अधिकारी सभ कहलनि जे उधमपुर, पठानकोट, आदमपुर आ भुज एयरबेसकेँ नुकसान भेल अछि। एकर अलावे, पाकिस्तान ड्रोन आ मिसाइल दागलक एवं अस्पताल आ स्कूलकेँ निशाना बनेलक।
विंग कमांडर व्योमिका सिंह एयर फोर्स स्टेशन सिरसा आ एयर फोर्स स्टेशन सूरतगढ़क शनिकेँ भोरक फोटो देखौलथि आ कहलकथि जे ई सुरक्षित अछि। प्रेस कॉन्फ्रेंसमे कहल गेल, “पाकिस्तानी सेना पश्चिमी सीमा सभ पर निरंतर हमला कऽ रहल अछि, ओ भारतक सैन्य ठिकानाकेँ निशाना बनेबाक लेल ड्रोन, लंबा दूरीक हथियार, युद्धक हथियार आ लड़ाकू विमानोंक इस्तेमाल कयलक अछि। भारत अनेक खतराकेँ नाकाम कय चुकल अछि, मुदा पाकिस्तान 26 सँ अधिक स्थान पर हवाई मार्गसँ घुसपैठ करबाक प्रयास कयलक। पाकिस्तान पंजाबक वायुसेना बेसकेँ निशाना बनेबाक लेल राति 1:40 बजे हाई-स्पीड मिसाइलक इस्तेमाल कयलक। ओ स्वास्थ्य सुविधा आ स्कूल पर सेहो हमला कयलक।”
ईहो सभ बताओल गेल, “पाकिस्तानक एहि हरकत सभक बाद तुरन्त जवाबी हमलामे एक्शन लेल गेल। रफीकी, मुरीद, चकलाला, रहमयार खान पर पाक सैन्य ठिकानाकें सटीक हथियार आ लड़ाकू जेटसँ हमला कएल गेल। सियालकोट केर एयरबेसो टारगेट कएल गेल।”
