केन्द्र सरकार भारत आ म्यांमारक बीच १६१० किलोमीटर नमगर अन्तर्राष्ट्रीय सीमापर बाड़ लगाबय आ सड़कक निर्माणकेँ मंजूरी देलक अछि। मणिपुरमे घुसपैठियाकेँ रोकबाक लेल सरकार द्वारा ई निर्णय लेल गेल अछि।
एकर अतिरिक्त मणिपुरमे सीआरपीएफक दूटा बटालियन सेहो स्थायी रूपसँ तैनात कयल गेल अछि, जखन कि २०,००० केन्द्रीय अर्धसैनिक बल एतय तैनात कयल गेल अछि।
जानकारीक अनुसार म्यांमारसँ लागैत अन्तर्राष्ट्रीय सीमापर ३० किलोमीटरक बाड़ लगयबाक काज पूरा भऽ चुकल अछि। सरकार द्वारा १५०० किलोमीटर धरि काजक लेल निधिकेँ मंजूरी देल गेल अछि।
पछिला साल ३ मईकेँ मणिपुरमे अनुसूचित जनजातिक दर्जा देबय लेल मेइती समुदायक माँगक विरोधमे ‘आदिवासी एकजुटता मार्च’ निकालल गेल छल। मार्चक दौरान हिंसा भड़कि गेल आ तहियासँ राज्यमे हिंसा जारी अछि। एहि हिंसामे एखनि धरि कुकी आ मेइती समुदायक २२०सँ बेसी लोकक जान चलि गेल अछि।
सरकारी सूत्रक अनुसार, पड़ोसी देश म्यांमारसँ घुसपैठिया मणिपुरमे प्रवेश कऽ रहल अछि। एकरा लेल आब भारत सरकार भारत-म्यांमार सीमा पर मुक्त आवाजाही प्रणालीकेँ समाप्त कऽ देलक अछि। जानकारी अनुसार सुरक्षा संबंधी मंत्रिमंडलीय समिति भारत-म्यांमारक बीच लगभग ३१,००० करोड़ टाकाक लागतसँ १,६१० किलोमीटर नमगर अन्तर्राष्ट्रीय सीमापर सीमावर्ती सड़कक निर्माण आ बाड़ लगयबाक लेल सैद्धांतिक स्वीकृति देलक अछि।
मणिपुरमे पाँच जिलामे कर्फ्यू लगा देल गेल अछि आ १५ सितम्बरकेँ दुपहरिया ३ बजे धरि इंटरनेट बन्द कऽ देल गेल छल। मुख्यमंत्री एन बीरेन सिंह हालहिमे कहने छलाह जे सरकार उपद्रवी सभक नफरत पसारयवाला भाषण आ सोशल मीडियासँ हिंसा भडकाबय केर रोकबाक लेल इंटरनेट बंद करबाक निर्णय लेलक। आशंका व्यक्त कयल जा रहल अछि जे किछु लोक राज्यमे स्थितिकेँ हिंसक बनयबाक लेल सोशल मीडियाक उपयोग कऽ सकैत छथि।
केन्द्रीय गृह मंत्री अमित शाह एकटा संवाददाता सम्मेलनक दौरान कहने छलाह जे सरकार मणिपुरमे शान्ति बहाल करबाक लेल मेइती आ कुकी समुदायक जनतासँ बातचीत कऽ रहल अछि। घुसपैठकेँ रोकबाक लेल म्यांमारक सीमापर बाड़ लगायब शुरू कऽ देल गेल अछि। पछिला सप्ताह तीन दिनक हिंसाकेँ छोड़ि मणिपुरमे स्थिति शान्तिपूर्ण अछि। सरकार शान्ति बहाल करबाक लेल हरसंभव प्रयास कऽ रहल अछि। ओ आगू कहलनि जे शान्ति कायम रखबाक लेल दुनू समुदायक सङ्ग बातचीत कयल जा रहल अछि।
