सीएम साइंस कॉलेजमे स्ववित्त पोषित योजना अंतर्गत संचालित तीन वर्षीय बीसीए पाठ्यक्रम केर सत्र 2024-27 मे नामांकन लेल 18 अप्रैलसँ आवेदन जमा लेल जायत। सोमदिन पाठ्यक्रम संचालन लेल गठित सलाहकार समितिक बैसारमे सर्वसम्मतिसँ ई निर्णय लेल गेल। प्रधानाचार्य सह पाठयक्रम निदेशक प्रो दिलीप कुमार चौधरी केर अध्यक्षतामे संपन्न भेल बैसारमे पाठ्यक्रम संयोजक डा अभिषेक शेखर, बर्सर डा यूके दास, पीजी गणित विभागक शिक्षिका डा नेहा वर्मा, अंग्रेजी विभागाध्यक्ष डा योगेश्वर साह, भौतिकी विभागक शिक्षक डा सुजीत कुमार चौधरी आ डा अजय कुमार ठाकुर, रसायन शास्त्र विभागक शिक्षक डा बीडी त्रिपाठी सहित पाठ्यक्रम सहायक अभिषेक कुमार शामिल भेलाह।
बैसारमे सर्वसम्मतिसँ सीबीसीएस पाठ्यक्रम पर आधारित एहि तीन वर्षीय पाठ्यक्रममे नामांकन लेल आवेदन केर प्रक्रिया 18 अप्रैलसँ प्रारंभ कयल जयबा पर सहमति बनल। जखनकि आवेदन केर अंतिम तारीख 18 मई निर्धारित कयल गेल। बैसारमे मई महीनेमे लिखित एवं मौखिक परीक्षाक आधार पर मेधा सूची तैयार कऽ नामांकन प्रक्रिया पूरा कऽ लेबा आ जून माह केर पहिल सप्ताहसँ एकर वर्ग संचालन शुरू कयल जयबाक निर्णय लेल गेल। आवेदन ऑनलाइन मोडमे महाविद्यालयक स्नातक काउंटर पर जमा लेल जायत।
अध्यक्षीय संबोधनमे प्रधानाचार्य प्रो दिलीप कुमार चौधरी कहलनि जे प्रतिस्पर्धाक वर्तमान दौरमे महाविद्यालयमे बीसीए पाठ्यक्रम शुरू भेलासँ छात्र-छात्राकें एकटा बेहतर विकल्प उपलब्ध भऽ गेल अछि। ओ बतोलनि जे गणित विषयक संग न्यूनतम 45 प्रतिशत अंकसँ बारहवीं उत्तीर्ण कोनो संकायक छात्र-छात्रा एहि पाठ्यक्रममे नामांकन लेल आवेदन कऽ सकैत छथि।
प्रधानाचार्य बतेलनि जे एकरा संगहि महाविद्यालयमे स्ववित्त पोषित योजना अंतर्गत पूर्वसँ संचालित छमाही सर्टिफिकेट पाठ्यक्रम क्रमशः मशरूम कल्टीवेशन, पीसी हार्डवेयर, मोबाइल रिपेयर्स, हेल्थ केयर आ हर्बल मेडिसीन पाठ्यक्रममे दाखिला केर प्रक्रिया सेहो शुरू कऽ देल गेल अछि।
