जन सूराजक संस्थापक प्रशांत किशोर रवि दिन एक दिवसीय दौरा पर मुजफ्फरपुर पहुँचलाह। एतय मुख्यमंत्री नीतीश कुमार पर निशाना साधैत ओ कहलनि जे बिहारक स्थिति लालू यादवक जंगलराजसँ बेसी खराब भऽ गेल अछि। नीतीश कुमारक शासनकालमे अधिकारीसभक जंगलराज अछि। नीतीश कुमारक राजनीतिक नैतिकता समाप्त भऽ गेल अछि।
ओ कहलनि जे एकटा समय छल जखनि नीतीश कुमार रेल मंत्री छलाह आ पश्चिम बंगालमे रेल दुर्घटनामे २०० लोकक मृत्यु भऽ गेल छल। ओहि समय नीतीश कुमार मंत्री पदसँ इस्तीफा दऽ देलखिन। आइ हुनकर पार्टी विधानसभामे हारि गेल अछि। २४३ सीटमेसँ हुनका लग मात्र ४२ सीट अछि, तैयो ओ मुख्यमंत्री बनल रहय चाहैत छथि।
प्रशांत किशोर आरोप लगओलनि जे नीतीश कुमार मात्र अपन कुर्सी लेल चिंतित छथि, ओ बस कुर्सी पर बैसय रहल चाहैत छथि चाहे भाजपाक संग होय वा राजदक संग। हुनका बिहारक लोकक समस्याक कोनो परवाह नहि छनि।
प्रशांत किशोर बिहारक वित्त मंत्री सम्राट चौधरी पर सवाल करैत कहलनि जे आरबीआई केर आंकड़ासँ पता चलैत अछि जे १९९० सँ २६ लाख करोड़ रुपया पूंजी बैंकक माध्यमसँ आन राज्यमे गेल अछि। ओ मांग कयलनि जे सरकार सीडी अनुपातक आंकड़ा जनताकेँ सामने प्रस्तुत करय आ ई बताबय कि बिहारक पूंजी राज्यसँ बाहर किएक पठाओल गेल अछि।
ओ बिहारमे गरीबी आ बेरोजगारीक सम्बन्धमे सेहो सरकारपर निशाना साधलनि। ओ कहलनि जे बिहारमे ८० प्रतिशत लोक एक दिनमे १०० रुपया सेहो नहि कमाबैत अछि। बिहारमे प्रति व्यक्ति आय ३४ हजार रुपया अछि। जँ पटना आ बेगूसरायकेँ बाहर राखल जाय तँ प्रति व्यक्ति आय मात्र २५ हजार रुपया अछि। मुदा, सरकार मनरेगा सन योजनाक निधिक उचित उपयोग नहि कऽ पाबि रहल अछि।
