चिराग पासवान बिहारक कानून व्यवस्था पर सवाल उठेलनि अछि। एकर जवाबमे जदयूक प्रवक्ता अभिषेक झा कहलनि जे ओ सब सहयोगी छथि वा विरोधी। लोकतंत्रमे सबकेँ अपन विचार व्यक्त करबाक अधिकार अछि।
आइ-काल्हि बिहारमे कानून व्यवस्था पर सवाल उठि रहल अछि। हत्याक दौर जारी अछि आ खास कऽ व्यापारी सभकेँ निशाना बनाओल जा रहल अछि। एहि बीच केंद्रीय मंत्री आ लोजपा (रामविलास) प्रमुख चिराग पासवान सेहो सरकार आ प्रशासनकेँ निशाना बनेलनि अछि। ओ कहलनि जे, ई बुझबासँ परे अछि जे बिहार पुलिसक जिम्मेदारी की अछि ?
डिप्टी सीएम विजय सिन्हाक बाद चिराग पासवान बिहार पुलिसक कामकाजक शैली पर सेहो सवाल उठाबैत एक्स पर पोस्ट करैत लिखलनि – “बिहारीकेँ आओर कतेक हत्याक सामना करय पड़त ? बिहार पुलिसक जिम्मेदारी की अछि से बुझबासँ परे अछि।”
बता दी जे एहिसँ पहिने चिराग पासवानक सांसद अरुण भारती आ शंभवी चौधरी सेहो अपराधक संबंधमे सरकारकेँ निशाना बनेने छलथि। सांसद अरुण भारती कहने छलाह जे गठबंधनमे रहलासँ हम सब सरकारक कमीकेँ उजागर करैत रहब। ई गठबंधन धर्मक खिलाफ नहि अछि।
ओतहि बढ़ैत अपराधक बीच जदयूक प्रवक्ता अभिषेक झा डिप्टी सीएम विजय सिन्हा आ चिराग पासवान द्वारा पुलिसक कार्यशैली पर उठायल सवाल पर कहलनि जे, ओ सहयोगी छथि वा विरोधी। लोकतंत्रमे सबकेँ अपन विचार व्यक्त करबाक अधिकार छैक। जहियासँ नीतीश कुमार सत्ताक बागडोर संभारने छथि तहियासँ कानूनक राज स्थापित कयलथि। अपराधी आ अपराधक संग कोनो समझौता नहि करय केर नीति अछि। पुलिस प्रशासन द्वारा तत्काल कार्यवाही कयल जाइत अछि। सरकारक मंशा पर सवाल ठाढ़ करब गलत अछि।
