दहेज विरोधी आंदोलनक प्रणेता आनंद झा केर आकस्मिक निधन

मुंबई समदिया
*

दरभंगा जिलांतर्गत बेनीपुरक बलहा गाम निवासी आ मुंबई मैथिल समाजक प्रिय अभियानी, मिथिला मैथिली आंदोलनक एकटा कर्मठ सेनानी, आनंद रामलखन झा, अल्प कालहिमे स्वर्गवासी भ’ गेलाह। ओ मात्र 47 वर्षक छलाह।

आनंद झा दहेजमुक्त भारत संस्थाक राष्ट्रीय अध्यक्ष छलथि, तैं देशक हर क्षेत्रमें दहेज विरोधी आंदोलनक अगुवाई करैत छलाह। मिथिला क्षेत्रमे अश्लीलता आ फुहर गीतक विरुद्ध सेहो हुनकर आंदोलन चलैत छैन्ह जे, अश्लील मुक्त मिथिलाक नामसँ अछि।

किछुए दिन पूर्व तेज बुखारसँ त्रस्त आनंद झाकेँ डॉक्टर कहलकनि जे, हुनका डेंगू भ’ गेल अछि। उपचारक क्रममे हुनका हार्ट अटैक भेल तदुपरांत चिकित्सक द्वारा हुनका मृत घोषित कएल गेल।

47 वर्षीय आनंद, एकटा गरीब परिवारसँ छलथि, आ मुंबईमे ओ कोनो आयकर अधिकारीक निजी ड्राइवर छलाह, जाहिसँ हुनकर जीवन यापन चलैत छलैन्ह। आनंद झा अपना पाछा, पत्नी कंचन आनंद झा, 5 पुत्री आ 1 गोट 12 वर्षक पुत्रके छोड़ि गेलाह। परिवारक सभटा जिम्मेदारी हुनके पर छलैन्ह, बाल बच्चा सभक शिक्षा – दीक्षा, पुत्री सभक शादी विवाह इत्यादि, मुदा आब समस्त परिवार लेल स्थिति विकट सिद्ध भ’ रहल अछि।

परिजन सभकेँ भरोस छैन्ह जे, जाहि समाज लेल आनंद झा, सदिखन तत्पर रहैत छलाह, ओ समाज आब निश्चित रूपसँ सहायताक लेल आगू आओत। आनंद झा केर आकस्मिक निधन पर देशभरिसँ लोक हुनक सद्गति लेल प्रार्थना क’ रहल छथि। दहेजमुक्त भारतक राष्ट्रीय प्रवक्ता आ वरिष्ठ समाजसेवी धनंजय झा सेहो अप्पन वक्तव्यक माध्यमे संपूर्ण मिथिला समाजसँ आव्हान कएलनि अछि की, आनंदक परिवारकेँ यथासंभव मददि अवश्य कएल जाए।