बिहारम आइ-काल्हि साइबर अपराधी तेजीसँ सक्रिय भs रहल अछि, साइबर ठगीक मामिला लगातार सामने आबि रहल अछि, एकरा देखैत सरकार विभिन्न माध्यमसँ लोककेँ सावधान रहबाक आ साइबर जालसाजसँ दूर रहबाक सलाह दs रहल अछि।
एहेनमे दरभंगासँ एकटा मामिला सामने आयल अछि, जतय साइबर अपराधी एक करोड़ 16 लाख टकाक ठगी कयलक।
जनतब जे दरभंगा साइबर थानाक पुलिस पैघ कारवाई कयलक आ 1 करोड़ 16 लाखक ठगी करय वाला अपराधीकेँ पकड़ि लेलनि, ठगी करय वाला अपराधीक पहिचान नितेश झा केर रूपमे कयल गेल अछि जेकरा पुलिस राजधानी पटनाक कंकड़बाग थाना क्षेत्रसँ गिरफ्तार कs लेलक अछि, एहि समस्त घटनाक संबंधमे पुलिस कहलक जे अपराधी नितेश झा आ ओकर साथी अजय कुमार ‘वेलफेयर’ नामक एकटा फर्जी कंपनी बनौने छल। बताओल गेल छल जे नितेश आओर अजय लोककेँ एक सालक लेल ‘वेलफेयर’ कंपनीक क्रिप्टोकरेंसीमे निवेश करय पर 4 गुना रिटर्नक वादा कs लुभाबैत छल, मधुबनी, समस्तीपुर आ दरभंगा जिलासँ सैकड़ों लोक एहि कंपनीमे निवेश कयने छलाह। मुदा, जखनि जांच भेल तs कंपनी फर्जी निकलल। पता चलल जे नीतेश आओर अजय बैंक ट्रांसफरक माध्यमसँ करीब एक करोड़ 16 लाख रुपया जमा कयने छल, दुनू मित्र बहुत दिन धरि बहाना बनौलक आ फेर कंपनी बंद क’ फरार भs गेल।
जानकारीक अनुसार ई पूरा मामिलाक खुलासा साल 2023 मे भेल छल आ शिकायत दर्ज कराओल गेल छल। एहि मामिलामे अजय कुमारकेँ गिरफ्तार कयल गेल। मुदा, नितेश झा फरार छल, जाहि कारण पुलिस ओकरा ताकि रहल छल। संगहि आब जखनि पुलिसके नीतेशक लोकेशनक बारेमे पता चलल तs पटनाकेँ कंकड़बाग थानासँ गिरफ्तार भेल, फिलहाल पुलिस एहि मामिलामे अपराधीसँ पूछताछ कs आगूक कारवाईमे लागल अछि।
