आंध्र प्रदेशक मुख्यमंत्रीक रूपमे शपथ लेबासँ एक दिन पहिने तेलुगु देशम पार्टी (टीडीपी)क प्रमुख चन्द्रबाबू नायडू मंगलदिन घोषणा कयलनि जे अमरावती राज्यक एकमात्र राजधानी होयत। नायडू टीडीपी, भाजपा आ जन सेनाक विधायकसभक संयुक्त बैसारकेँ सम्बोधित कऽ रहल छलाह। बैसारमे हुनका सर्वसम्मतिसँ आन्ध्र प्रदेश विधानसभामे राजगक नेता चुनल गेल।
एहि दौरान ओ कहलनि जे हमर सरकारमे तीन राजधानीक आड़मे कोनो खेल नहिं होएत। हमर राजधानी अमरावती अछि। राज्यक विभाजनक बाद चन्द्रबाबू नायडू पहिल मुख्यमंत्री बनलाह। ओ २०१४ सँ २०१९ धरि मुख्यमन्त्री रहलाह। नायडू अमरावतीकेँ राजधानी बनयबाक विचार रखलनि।
मुदा, नायडूक विचारकेँ तखन झटका लागल जखन ओ २०१९ मे सत्ता हारि गेलाह आ वाईएस जगन मोहन रेड्डीक नेतृत्वमे वाईएसआरसीपी भारी जीत हासिल कयलक। तखन रेड्डी अमरावती शहरक योजनाकेँ स्थगित कऽ देलनि आ तीनटा राजधानीक एकटा नव विचार आगू रखलनि, जकरा नायडू आब एक मात्र राजधानी रखबाक निर्णयक संग बदलि देलनि अछि।
आन्ध्र प्रदेशमे हालक विधानसभा चुनावमे टीडीपी, भाजपा आ जन सेनाक गठबन्धन एकतरफा जीत हासिल कयलक। विधानसभा चुनावमे एनडीए गठबन्धन १६४ सीट जितलक। लोकसभा चुनावमे भाजपा भारी बहुमतसँ २१ सीट जितलक। ई जनादेश अमरावतीकेँ राजधानी बनयबाक योजनामे नव जान फूँकि देलक अछि।
