उत्तराखंडक कोटद्वारमे लगभग 3 वर्ष पुरान अंकिता भंडारी हत्याकांडमे अदालतक फैसला आयल अछि। अदालत तीनू आरोपीकेँ दोषी ठहरेलक।
अंकिता भंडारीक शव कैनालसँ बरामद कएल गेल छल। आब एहि बहुचर्चित हत्याकांड मामिलामे कोटद्वारक अपर जिला आ सत्र न्यायाधीशक अदालत काल्हि फैसला सुनौलक अछि। अदालत तीनू आरोपीकेँ उम्रकैदक सजा सुनौलक। उत्तराखंडक कोटद्वार स्थित अतिरिक्त जिला आ सत्र न्यायाधीश न्यायालयमे अंकिताक हत्याक मामिलामे तीनटा आरोपी पुलकित आर्य, सौरभ भास्कर आ अंकित गुप्ताकेँ दोषी मानलक अछि।
लगभग दू वर्ष आ आठ महिना धरि चलल सुनवाईमे 47टा गवाह सभ अदालतमे बयान देलक। एकर अलावा मामिलामे एसआईटी 97 टा गवाह बनने रहय, जाहिमे सँ 47 महत्वपूर्ण गवाहकेँ अदालतमे पेश कएल गेल।
जनतब जे उत्तराखंडक ऋषिकेशक नजदीक पौड़ी जिलाक गंगा भोगपुर क्षेत्रमे वनंत्रा रिसॉर्टमे रिसेप्शनिस्टक काज कय रहल 19 वर्षक अंकिता भंडारीक सितंबर 2022 मे हत्या कय देल गेल छल। घटनाक एक सप्ताहक बाद चीला नहरसँ अंकिताक शव बरामद भेल छल। एहि मामिलामे ओहि समय पुलिस रिजॉर्ट मालिक संचालक पुलकित आर्य आ ओकर दोसर कर्मचारी सौरभ भास्कर आ अंकित गुप्ताकेँ गिरफ्तार कय चुकल छल। जाँचमे खुलासा भेल की आरोपी सभ अंकिताक हत्या चीला नहरिमे धक्का दऽ मारि देने छल।
अंकिताक हत्या करबाक कारण रिजॉर्टमे वीआईपीकेँ एक्स्ट्रा सेवा देबासँ मना करब बताओल गेल छल। एहि घटनाक बाद उत्तराखंडमे भारी हंगामा देखल गेल छल। हंगामाक बाद उत्तराखंड सरकार जांचक लेल उप महानिरीक्षक पी रेणुका देवीक नेतृत्वमे विशेष जांच टीम गठित कयने छल। अंकिताक हत्याकेँ बाद आरोपी सभकेँ 24 घंटाक भीतर जेल भेजल गेल आ एखनि धरि ओ सब सलाखक पाछा अछि।
अंकिता भंडारी हत्या मामिलामे जांच खातिर एसआईटीक गठन कयल गेल छल। एकर अतिरिक्त आरोपी सभ पर गैंगस्टर अधिनियमक अंतर्गत सेहो मामिला दायर कयल गेल छल। धामी सरकार द्वारा अंकिता भंडारीक परिवारकेँ ₹25 लाखक आर्थिक सहायता देल गेल छल। पूरा मामिलामे 500 पन्नाक चार्जशीट दाखिल कयल गेल। अंकिताक परिजनक माँग पर 3 बेर सरकारी वकील बदलल गेल। एकर संगहि अंकिताक भाई आ पिताकेँ सरकारी नौकरी देल गेल। कोर्टमे सरकारी वकील द्वारा कयल गेल पैरवीसँ आरोपी सभ द्वारा देल गेल जमानत अर्जी हर बेर खारिज कयल गेल।
