अन्हर बिहारिसँ भारी नोकसान, राजनगर मधुबनी रेलवे लाइन पर गाछ खसलासँ ट्रेन यातायात बाधित

राजनगर (मधुबनी) समदिया
*

रविक राति इलाकामे आयल अन्हर-बिहारिसँ पैघ नोकसान भेल। कतेको लोकक फुसक घर क्षतिग्रस्त भऽ गेल। राजनगर ड्योढ़ी लग श्याम कुमारक घर उधिया गेल। नरकटिया गाछी टोलक शहाबुद्दीन अंसारीक घर सेहो उधिया गेल। ओतहि सयोटासँ अधिक गाछ टूटल जाहिसँ लोकक आवागमन प्रभावित भेल। दर्जनों जगह पर गाछ टुटिकय सड़क पर खसल जाहिसँ सड़क यातायात प्रभावित भेल।

राजनगर बाबूबरही सड़क मार्ग पर कोठी हाटसँ पूब गाछ टुटिकय खसलासँ कतेको घण्टा धरि यातायात बाधित रहल। तऽ राजनगर भीएसजे महाविद्यालय केर पूब आ पश्चिम दुनु कात सड़क पर गाछ खसलासँ भरि दिन यातायात बाधित रहल।

सभसँ बेसी नोकसान ट्रेन सेवा बाधित भेलासँ भेल। राजनगर मधुबनी रेलवे स्टेशनक बीच 17 नम्बर गुमटी लग एकटा विशाल सिमरक गाछ रेलवे लाइन पर टुटिकय खसि पड़ल। गाछक रेलवे लाइन पर खसलाक कारणे ट्रेन परिचालन लेल विद्युत आपूर्ति बाधित भऽ गेल। एहि कारणे जयनगर दरभंगा रेल खण्ड पर ट्रेन सेवा बाधित भेल। कतेको ट्रेनकेँ रद्द कऽ देल गेल। तऽ कतेको ट्रेनकेँ सकरी स्टेशनसँ परिचालन कयल गेल। समाचार प्रेषण धरि रेलवे लाइन पर विद्युत आपूर्ति आ ट्रेनक परिचालन आरम्भ नहि भऽ सकल छल। कतेको बुजुर्ग लोकनिक कहब छल जे एहेन अन्हर-बिहारि नहि देखने छलहुँ।