आंग्ल नव वर्षक स्वागत बिहारमे होयत बरखा संग, शीतलहरी आ कुहेसक चेतौनी

पटना
*

आंग्ल नव वर्षसँ पहिने बिहारमे मौसम बदलि गेल अछि। राज्यमे ठंढा बसात आ बादल छाओल रहल, जाहिसँ लोककेँ ठंढाक अनुभव भऽ रहल अछि। मौसम विभागक अनुसार १ जनवरीकेँ राज्यक कतेको क्षेत्रमे बरखा होयबाक सम्भावना अछि।

मौसम विभागक अनुसार आंग्ल नव वर्षमे राज्यक कतेको जिलामे बरखा होयबाक सम्भावना अछि। विभाग १३ जिलामे बरखा आ गरज-चमकक चेतावनी जारी कयलक अछि। संगहि, भोर आ रातिमे तापमानमे गिरावट आबि सकैत अछि।

पटना मौसम विज्ञान केन्द्रक अनुसार बक्सर, भोजपुर, रोहतास, भबुआ, औरंगाबाद, अरवल, पटना, गया, नालंदा, शेखपुरा, नवादा, बेगूसराय, लखीसराय आ जहानाबादमे हल्लुकसँ मध्यम बरखा भऽ सकैत अछि। एकर अतिरिक्त, मंगल दिन आसमानमे बादल छल, जाहिसँ राति कने गर्म महसूस भऽ सकैत अछि। पश्चिमी विक्षोभक कारण ठंढ़ बसात बहैत अछि, मुदा तापमानमे बेसी परिवर्तन नहि भऽ रहल अछि। मुदा, राज्यमे उत्तर-पश्चिमी बसात १० सँ १५ किलोमीटर प्रति घण्टाक गतिसँ बहि रहल अछि, जाहि कारणसँ तापमानमे गिरावट दर्ज कएल जा रहल अछि।

आंग्ल नव वर्षमे गयामे बरखा होयबाक सम्भावना अछि, जाहिसँ जाड़ बढ़ि सकैत अछि। मौसम विभाग लोकसभकेँ ठंढसँ बचबाक लेल आवश्यक डेग उठयबाक सलाह देलक अछि।

आंग्ल नव वर्षसँ पहिने पटनामे मौसम बदलि गेल अछि। भोरसँ शहरमे ठंढ बसात आ बादल छाओल रहल, जाहिसँ लोकसभकेँ कड़गर ठंढाक अनुभव भेल। मौसम विभागक अनुसार, पटनामे न्यूनतम तापमान मंगलकेँ १७ डिग्री सेल्सियस दर्ज कयल गेल जखन कि अधिकतम तापमान ६.६ डिग्री सेल्सियससँ खसि कऽ १९.६ डिग्री सेल्सियस धरि रहल। न्यूनतम आ अधिकतम तापमानमे कम अंतरक कारण भयंकर शीतलहर अछि।

मौसम विभागक अनुसार पछिला किछु दिनसँ सासारामक तापमानमे गिरावट आबि रहल अछि। सासाराममे शीतलहर बढ़बाक सम्भावना अछि आ तापमानमे दूसँ चारि डिग्री सेल्सियसक गिरावट आबि सकैत अछि।