समस्तीपुर जिलाक सरायरंजन थाना क्षेत्रक अंतर्गत भागवतपुर गाममे एकटा महिला आओर तीन लोक पर तेजाब हमलाक मामिला सामने आयल अछि, एहि हमलामे चरित्र दास, सुरेन्द्र दास, हुनकर पत्नी बबिता देवी आ बालेश्वर दास गंभीर रूपसँ झुलसि गेल छथि। घटनाक बाद आरोपी मौकासँ भागि गेल, आस-पासक लोक घायल लोकसभकेँ सदर अस्पतालमे भर्ती करा देलक।
पीड़ित बबिता देवी कहलनि जे, हमलाक आरोपी मोतीलाल रायक बेटा चंदन, मुन्ना कुमार आ धर्मेन्द्रसँ हुनक पुरान विवाद छल। किछु साल पहिने पुलिसमे शिकायत दर्ज कराओल गेल छल जखनि आरोपी हुनकर घरमे घुसबाक प्रयास करैत छल। तखनि पुलिसमे शिकायत दर्ज भेल छल, कोर्टमे मामिला एखनो चलि रहल अछि आ आरोपी लगातार केस वापीस लेबाक दबाव बना रहल छल।
बबिता देवी कहलनि जे, शुक्रदिन साँझमे ओ घरक पाछू किछु काजसँ जा रहल छलीह, तखने चंदन आ मुन्ना हुनका संग दुर्व्यवहार करबाक प्रयास कयलक। जखनि ओ विरोध कयलनि तs आरोपी हुनका पर बोतलमे राखल तेजाब फेकि देलक। एहिसँ ओ गंभीर रूपसँ झुलसि गेलीह । बबिताक चीत्कार सुनि परिवारक अन्य सदस्य मौका पर पहुंचल, मुदा आरोपी हुनका सभ पर सेहो तेजाब फेंकलक आ फेर ओतयसँ भागि गेल।
एहि घटनाक बाद स्थानीय लोक जल्दी घायलकेँ अस्पताल पठा देलक। पुलिस आब आरोपीक खोजमे लागल अछि, आओर उम्मीद अछि जे जल्दिये आरोपीक गिरफ्तारी कएल जाएत, पुलिस मामिलाक जांच शुरू कऽ देलक अछि आ एसिड हमला जेहन घिनौना घटनामे आरोपीक खिलाफ सख्त कारवाईक तैयारीमे अछि।
एहि घटनासँ क्षेत्रमे भारी आक्रोश पैदा भs गेल अछि, बल्कि सुरक्षा आ जागरूकताक आवश्यकता केर सेहो उजागर करैत अछि। लोक एसिड अटैक जकाँ घटनाक बढ़ोतरी आ महिला पर हिंसाक प्रति संवेदनशीलताकेँ लऽ कऽ सख्त कारवाईक मांग कऽ रहल अछि।
