दरभंगाक अमता घरानाक विश्वविख्यात ध्रुवपद संगीताचार्यक नामसँ संचालित संस्था ‘पंडित विदुर मल्लिक ध्रुवपद संगीत गुरुकुल’क तत्वावधानमे आइ रवि, 23 मार्चकें कामेश्वर सिंह दरभंगा संस्कृत विश्वविद्यालयक दरबार हॉलमे पंचम ध्रुवपद सम्राट पंडित विदुर मल्लिक आ पद्मश्री पंडित राम कुमार मल्लिकक पुण्य स्मृतिमे संगीत समारोह-2025 केर आयोजन कयल जायत। एहि समारोहमे अंतरराष्ट्रीय स्तर केर प्रसिद्ध कलाकार लोकनिक अभूतपूर्व समागम होयत। सरोज मल्लिक केर अध्यक्षतामे कार्यक्रम केर रूपरेखाकें शनिदिन अंतिम रूप देल गेल।
आयोजन समिति दिसिसँ भेटल जनतब अनुसार समारोहक मुख्य अतिथि दरभंगा राजपरिवारक युवराज कुमार कपिलेश्वर सिंह हेताह। जखनि कि विशिष्ट अतिथि केर रूपमे कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेय केर गरिमामयी उपस्थिति रहतनि।
एहि समारोहमे पहिल प्रस्तुति डॉ समित मल्लिक केर शिष्य विपुल छाबड़ा आ ऋषिकेश मिश्रा केर युगल ध्रुपद गायनक होयत। द्वितीय प्रस्तुति गयासँ आयल राजेंद्र कुमार सिजवारक ख़्याल आ ठुमरी गायन, तृतीय प्रस्तुति साहित्य संगीत मल्लिक (मल्लिक बन्धु) केर युगल ध्रुपद गायन, चतुर्थ प्रस्तुति ग्वालियरसँ आयल डागर घरानाक अभिजीत सुखदाने केर ध्रुपद गायन, पंचम प्रस्तुति दिल्लीसँ आयल पंडित प्रभात कुमार केर सरोद वादन आ अंतिम प्रस्तुति डॉ. समित मल्लिक आ संतोष मल्लिकक युगल ध्रुपद गायनसँ होयत।
संगत कलाकारक रूपमे पखावज पर कौशिक कुमार मल्लिक आ संगीत पाठक रहताह, जखन कि तबला पर पं. रमेश कुमार मल्लिक आ चंदन ठाकुर संगत करताह। डॉ. वेद प्रकाश आर्य केर संचालनमे आयोजित एहि विशिष्ट आयोजनमे तानपूरा पर संगतमे गुरुकुल केर शिष्य क्रमशः प्रतीक झा, हर्षवर्धन झा, मयंक झा, स्वरित मल्लिक, रघुवीर ठाकुर, प्रभात मल्लिक, रामकिंकर झा, ऋषिकेश सिंह, सुंदरम कुमारी, प्रियंका कुमारी आ युवराज कुमार रहताह।
