केंद्रीय गृह मंत्री अमित शाह रवि दिन इंडिया गठबंधन पर जोरदार निशाना साधलनि। आगामी लोकसभा चुनावक बारेमे पैघ भविष्यवाणी करैत गृहमंत्री कहलनि जे हुनका २०२९ मे सेहो विपक्षमे बैसबाक तैयारी करबाक चाही। शाह ई टिप्पणी जल आपूर्ति परियोजना ‘न्याय सेतु’क उद्घाटन आ चंडीगढ़मे स्मार्ट सिटी मिशनक शुभारम्भ करैत कयलनि।
ओ प्रधानमंत्री नरेन्द्र मोदीक सेहो प्रशंसा कयलनि आ कहलनि जे एनडीए देशमे २०२९क लोकसभा चुनाव फेरसँ जीतत। “इंडिया गुटकेँ २०२९ मे सेहो विपक्षमे बैसबाक लेल तैयार रहबाक चाही। हम अहांकेँ आश्वस्त करैत छी जे विपक्षकेँ जे करय केर अछि ओ करय दियौक, २०२९ मे पुनः एनडीए आओत आ मोदीजी अओताह। ओ (विपक्ष) नहिं जनैत छथि जे एहि चुनावमे भाजपा जतेक सीट जितलक ततेक कांग्रेसकेँ पिछला तीन चुनावमे भेटल छल।”
विपक्ष पर प्रहार करैत अमित शाह कहलनि हुनका विपक्षमे काज करब सीखबाक चाही। “ई लोक जे अस्थिरता पसारय चाहैत छथि आ बेर-बेर कहैत छथि जे ई सरकार नहिं चलयवला अछि। हम हुनका सभकेँ आश्वस्त करय लेल आयल छी जे सरकार मात्र अपन कार्यकाल पूरा नहिं करत, बल्कि अगिला सरकार राजगक होयत आ विपक्षकेँ विपक्षमे बैसि ठीकसँ काज करब सीखय लेल तैयार रहय केर चाही।’’
न्याय सेतु परियोजनाक महत्व पर केंद्रीय गृह मंत्री कहलनि, “ई एकटा महत्वपूर्ण कार्यक्रम अछि। पानि बहुत महत्वपूर्ण अछि, हम एकरा बिना जीवित नहिं रहि सकैत छी। जखन पानि साफ नहिं होइत अछि तखनि हमरा बहुत रास रोग होइत अछि। एहि सम्पूर्ण क्षेत्रक लेल एहि परियोजनाक माध्यमसँ क्षेत्रक लोककेँ २४ घंटा फिल्टर-स्वच्छ पानिक आपूर्ति कयल जायत। ई समयक कसौटी पर खरा उतरत।”
शाह कहलनि, “ई परियोजना लगभग १२५ एकड़मे पसरल अछि। जहियासँ मोदी प्रधानमंत्री बनलाह, तहियेसँ स्मार्ट सिटी पर ध्यान केन्द्रित कयल जा रहल अछि आ चंडीगढ़ एहि सूचीमे सबसँ ऊपर अछि। एखन धरि एक लाख करोड़ रुपया खर्च भेल अछि। देशक ७४ प्रतिशत घरमे स्वच्छ पेयजल उपलब्ध करयबाक मिशन पूरा भऽ गेल अछि आ जलजनित रोगमे बहुत कमी आयल अछि। मोदीक तेसर कार्यकाल समाप्त होयबासँ पहिने देशक प्रत्येक घरमे स्वच्छ पानि पहुँचयबाक काज पूरा भऽ जायत।”
