बंगाल लेल भाजपाक घोषणापत्रमे अमित शाह कहलनि – 45 दिनक भीतर 7म वेतन आयोग आ छः महिनाक भीतर UCC
कोलकाता । समदिया
केंद्रीय गृहमंत्री अमित शाह शुक्रदिन पश्चिम बंगालक दौरा पर छलथि। एहि दौरान ओ विधानसभा चुनाव 2026 लेल भारतीय जनता पार्टी (भाजपा)क घोषणापत्र जारी केलखिन। अमित शाह एहि घोषणापत्रकेँ ‘भरोसाक पत्र’ बतबैत कहलखिन जे ई ‘सोनार बांग्ला’ बनाबय केर रोडमैप अछि, जाहिमे विकास, रोजगार, महिला सशक्तिकरण आ राष्ट्रीय सुरक्षा पर खास जोर देल गेल अछि। संगहि ओ ई भरोसा देलखिन जे भाजपा बंगालक बेटाकेँ मुख्यमंत्री बनाओत।
शाह कहलनि जे ई संकल्प पत्र राज्यक सभ वर्गक उम्मीदकेँ ध्यानमे राखि तैयार कएल गेल अछि आ वर्तमान निराशाक स्थितिसँ बाहर निकलय केर रास्ता देखबैत अछि। हुनका अनुसार किसान, युवा आ महिला लेल विशेष योजना शामिल अछि। कृषि क्षेत्रमे चुनौतीसँ जूझि रहल किसान लेल राहत, आ युवा- महिला सशक्तिकरण पर विशेष ध्यान देल गेल अछि। संगहि बंगालक सांस्कृतिक पहिचान आ गौरवकेँ पुनर्स्थापित करय केर बात सेहो शामिल अछि।
शाह सरकारी कर्मचारी लेल डीए सुनिश्चित करबाक बात कहलनि आ 45 दिनक भीतर 7म वेतन आयोग लागू करबाक घोषणा कयलनि। संगहि आयुष्मान भारत सहित केंद्र सरकारक योजना लागू करबाक बात कहलखिन। छह महीनाक भीतर समान नागरिक संहिता (UCC) लागू करबाक वादा सेहो कएल गेल।
महिला लेल ‘लक्ष्मी भंडार’ योजनाक तहत हर महीना 1 सँ 5 तारीखक बीच 3000 रुपया ट्रांसफर करबाक घोषणा कएल गेल अछि।
भाजपा राज्यमे सरकारी नौकरी (पुलिस सहित) मे महिला लेल 33% आरक्षण देबाक वादा कयलक अछि। 75 लाख महिलाके ‘लखपति दीदी’ बनाबयकेँ लक्ष्य राखल गेल अछि। सुरक्षा लेल हर मंडलमे महिला थाना आ महिला डेस्क बनत।
गर्भवती महिलाकेँ 21,000 रुपया आर्थिक सहायता आ 6 पोषण किट देल जायत। राज्यक बसमे महिला लेल मुफ्त यात्राक सुविधा देबाक वादा सेहो कएल गेल अछि। किसान लेल पीएम किसान योजनाक अतिरिक्त 3000 रुपया राज्य सरकार देत, जाहिसँ कुल 9000 रुपया सालाना सहायता भेटत।
घोषणापत्रक 10 मुख्य बात
6 महीनामे UCC लागू करबाक वादा
महिला आ बेरोजगार युवाकेँ हर महीना 3000 रुपया
मवेशी तस्करी पर सख्त रोक
‘वंदे मातरम म्यूजियम’ निर्माण
सरकारी नौकरीमे महिला लेल 33% आरक्षण
45 दिनमे 7म वेतन आयोग लागू
उत्तर बंगालमे AIIMS, IIT, IIM स्थापना
किसान लेल अतिरिक्त 3000 रुपया सहायता
चारि नव टाउनशिप विकसित कएल जायत।
स्वास्थ्य योजनाक आयुष्मान भारतसँ जोड़ल जायत।
कोलकाता मेट्रो केर पूर्ण विद्युतीकरण, रेलवे परियोजना केर तेजी, आ 200 दिनमे अवैध कब्जा हटाबय केर लक्ष्य राखल गेल अछि। नदी-नालामे आधुनिक पेट्रोलिंग व्यवस्था सेहो लागू कएल जायत।
नव स्नातक युवाकेँ हर महीना 3000 रुपया भत्ता देल जायत। प्रतियोगी परीक्षाक तैयारी करय वाला छात्रकेँ 15,000 रुपया एकमुश्त सहायता देबाक योजना अछि। पेपर लीक आ भर्ती घोटालासँ प्रभावित अभ्यर्थीकेँ 5 साल तक आयु सीमामे छूट देबाक प्रस्ताव अछि।
शाह कहलखिन—“हम वंशवादमे विश्वास नहि करैत छी। भाजपा बंगालमे बंगाली चेहराकेँ मुख्यमंत्री बनाओत।”
अमित शाह पश्चिम मेदिनीपुरक डेबरामे जनसभा आ खड़गपुरमे रोड शो सेहो करताह। ओ कहलनि जे बंगाल परिवर्तन चाहैत अछि आ जनतासँ सीधा संवाद करय लेल उत्साहित छथि।
