गृहमंत्री मणिपुरक सुरक्षा स्थितिक समीक्षा कयलनि। हुनका राज्यक समग्र कानून व्यवस्थाक स्थितिक विषयमे विस्तृत जानकारी देल गेल।
केन्द्रीय गृह मंत्री अमित शाह शनिदिन सुरक्षा बलकेँ निर्देश देलनि जे ८ मार्चसँ मणिपुरक सभ सड़कपर लोकक निर्बाध आवाजाही सुनिश्चित कयल जाय। मणिपुरमे सुरक्षा स्थितिक समीक्षाक लेल आहूत बैसारक अध्यक्षता करैत गृहमंत्री कहलनि जे सड़कपर बाधा उत्पन्न करयवलाक विरुद्ध कठोर कारवाई कयल जयबाक चाही।
पूर्वोत्तर राज्यमे राष्ट्रपति शासन लगलाक बाद ई एहेन पहिल बैसार अछि। मई २०२३ सँ इम्फाल घाटी आ लगपासक पहाड़ीमे मेइती आ कुकी समुदायक बीच जातीय हिंसामे २५० सँ बेसी लोकक मृत्यु भऽ चुकल अछि आ हजारो लोक विस्थापित भऽ चुकल छथि। गृहमंत्री मणिपुरक सुरक्षा स्थितिक समीक्षा कयलनि आ राज्यक समग्र कानून व्यवस्थाक स्थितिक विषयमे विस्तृत जानकारी देलनि।
बैसारमे राज्यपाल अजय कुमार भल्ला आ मणिपुर सरकार, सेना, आ अर्धसैनिक बलक शीर्ष अधिकारी उपस्थित छलाह।
एन. बीरेन सिंह द्वारा मुख्यमंत्रीक पदसँ इस्तीफा देलाक किछु दिन बाद पूर्वोत्तर राज्यमे राजनीतिक अनिश्चितता उत्पन्न भऽ गेल। तकर बाद, केन्द्र १३ फरवरीकेँ मणिपुरमे राष्ट्रपति शासन लागू कऽ देलक।
२० फरवरीकेँ राज्यपाल भल्ला लूटल आ अवैध रूपसँ राखल गेल हथियारक स्वैच्छिक आत्मसमर्पण सात दिनक भीतर पुलिसकेँ सुपूर्द करबाक आग्रह कयलनि। ओ आश्वासन देलनि जे एहि अवधिमे हथियार आत्मसमर्पण करयवलाक विरुद्ध कोनो दंडात्मक कारवाई नहि कयल जायत।
एहि अवधिमे, मुख्य रूपसँ घाटी जिलामे, जनता द्वारा ३०० सँ बेसी हथियार आत्मसमर्पण कयल गेल। एहिमे मैइती चरमपंथी समूह अरम्बाई टेंगोल द्वारा सौंपल गेल २४६ आग्नेयास्त्र शामिल अछि। भल्ला लूटल आ अवैध हथियारकेँ पुलिसकेँ सौंपय केर समय सीमा शुक्रकेँ बढ़ाकय ६ मार्च साँझ ४ बजे धरि कय देलनि।
