महाकुंभमे देश-विदेशसँ संत आ भक्त पवित्र नदीमे डुबकी लगेबाक लेल जमा भऽ रहल छथि। संगहि केन्द्रीय गृह मंत्री अमित शाह सेहो एहि आध्यात्मिक आयोजनक सराहना कयलनि अछि। ओ कहलनि जे महाकुम्भसँ बेसी सद्भाव आ एकताक सन्देश दुनियाक कोनो आन आयोजन नहि दैत अछि। शाह पुष्टि कयलनि जे ओ २७ जनवरीकेँ महाकुम्भमे गंगामे पवित्र स्नान करबाक लेल आबि रहल छथि।
ओ गुजरात विश्वविद्यालय मैदानमे हिन्दू आध्यात्मिक आ सेवा मेलाक उद्घाटन कयलाक बाद बाजि रहल छलाह। एतय ओ कहलनि जे प्रयागराजमे जाहि पैमाना पर महाकुम्भक आयोजन भेल अछि से देखि दुनिया भरिक लोक चकित छथि। एतबे नहि, विभिन्न देशक राजदूत हुनका ‘निमंत्रण पत्र’क लेल अनुरोध कयलनि। “हम हुनका कहलहुँ जे कोनो औपचारिक निमंत्रण नहि अछि कियैक तँ ग्रहक स्थितिक अनुसार करोड़ो लोक एकटा विशिष्ट समय पर उपस्थित भऽ गंगामे डुबकी लगाबैत छथि। ओ कहलनि हमरा कहला पर ओ सभ विश्वास नहिं कऽ रहल छथि जे 40 करोड़ लोक एक ठाम जमा होइत छथि।
अपन संबोधनमे शाह कहलनि जे कुम्भ सद्भाव आ एकताक सन्देश दैत अछि किएक तँ ओतय कियो ककरो ई नहि पूछैत अछि जे ओ कोन धर्म, सम्प्रदाय वा जातिक छथि। अहाँकेँ ओतय बिना कोनो भेदभावक भोजन भेटत आ पवित्र डुबकी लगेलाक बाद घर वापिस चलि जायब। दुनियाक कोनो आन आयोजन एहिसँ नीक संदेश नहि दैत अछि।
केन्द्रीय मंत्री कहलनि जे एतेक विशाल जनसमूहमे रहलाक बादो कियो होटलमे नहि रहैत अछि कियैक तँ सबके गंगा तट पर टेंटमे रहबाक सुविधा भेटैत अछि। ओ गुजरातक जनता, विशेष रूपसँ युवासभसँ महाकुम्भमे भाग लेबाक आग्रह कयलनि। शाह इहो कहलनि जे ओ स्वयं २७ जनवरीकेँ महाकुम्भमे गंगामे पवित्र स्नान करबाक लेल अयताह।
आगू बजैत शाह मोदी सरकारक कार्यकालक सेहो प्रशंसा कयलनि। ओ कहलनि जे दस सालमे स्थिति बदलि गेल अछि। आब हमर विचारधाराक अनुसार लगभग सभ लंबित काज पूरा भऽ गेल अछि, चाहे ओ जम्मू-कश्मीरसँ अनुच्छेद ३७० हटायब होय, अयोध्यामे राम मन्दिरक निर्माण, तीन तलाकक उन्मूलन वा यूसीसीक कार्यान्वयन। आब भाजपा अपन तेसर कार्यकालमे सेहो एही राह पर आगू बढ़ैत रहत।
आगू बजैत शाह पछिला कांग्रेस सरकारक आलोचना सेहो कयलनि। ओ कहलनि जे मोदी सरकार एहि अधूरा काजकेँ दस सालमे पूरा कयलक, मुदा पछिलका सरकार ७० साल धरि एहि अधूरा काजकेँ नहि छूलक।
