अमेरिकी उपराष्ट्रपति जेडी वेंस पत्नी उषा आ बच्चा सभक संग ताजमहलक दर्शन कएलनि। करीब डेढ़ घंटा धरि परिवारक संग जेडी वेंस इमारतक दर्शन कएलनि। एहि दौरान ओ विजिट बुकमे लिखलनि, “ताजमहल सचमुच अद्भुत अछि।”
ताजमहल परिसरमे पहुँचैत अमेरिकी उपराष्ट्रपति जेडी वेंसक चेहरा पर एकटा अलगे मुस्कान देखाई देलक। मानू ओ ताजक सुंदरताकेँ शब्दमे बयां नै कऽ पाबि रहल छलथि। पत्नी आ बच्चा सभक संग एहि दौरान ओ फोटो खिचबैत रहथि।
खेरिया हवाई अड्डा पर मुख्यमंत्री योगी आदित्यनाथ फूलक गुलदस्ता भेंट कय हुनकर स्वागत कएलनि। अमेरिकी उपराष्ट्रपति जेडी वेंस पत्नी उषा आ बच्चा समेत खेरिया हवाई अड्डा पर निर्धारित समय पर पहुँचलाह। एतयसँ ताजमहल धरि उपराष्ट्रपतिक रूट पर सुरक्षाक चाक चौबंद इंतजाम कएल गेल छल। सांस्कृतिक आयोजनक लेल मंच सेहो सजल छल। मुदा, जम्मू कश्मीरक पहलगाममे भेल आतंकी हमलाक बाद शोकमे सांस्कृतिक आयोजन नहि भेल। उपराष्ट्रपतिक काफिला जखनि एयरपोर्टसँ निकलल, तँ बच्चासभ भारत आ अमेरिकाक झंडा देखा अभिवादन कएलक। पहिल बेर भारत यात्रा पर आयल अमेरिकी उप राष्ट्रपति जेडी वेंसकेँ राज्य अतिथिक दर्जा देल गेल अछि। एहि लेल मुख्यमंत्री योगी स्वयं एयरपोर्ट पर हुनका स्वागत आ सत्कार कएलनि।
जनतब जे अमेरिकी सुरक्षा एजेंसी तीन दिनसँ आगरामे डेरा डालने अछि। एयरपोर्टसँ शिल्पग्राम आ ताजमहल धरि करीब 12 किमी. सड़क पर कड़ा सुरक्षा राखल गेल अछि।
जाहि रूटसँ उप राष्ट्रपति केर काफिला गुजरल ओतय जीरो ट्रैफिक कयल गेल। पुलिस आ प्रशासनिक अधिकारी मंगलदिन रात्रि धरि तैयारीमे जुटल रहला। अधिकारीगण तैयारी सभक रिहर्सल कएलनि। जिलाधिकारी केर आदेशक अनुसार बुधदिन सभ स्कूल बंद रहल।
