अमेरिकी युद्धक विमान यमनक राजधानी सना आ उत्तरी प्रान्त सादामे कतेको हूती ठिकाना पर हवाई हमला कयलक, जाहिमे कमसँ कम १३ लोकक मृत्यु भऽ गेल। हूती द्वारा संचालित अल-मसीरा टीवी स्वास्थ्य मंत्रालयक हवाला दैत कहलक, “ई प्रारंभिक संख्या अछि। मृतकक संख्या बढ़ि सकैत अछि। एहि हमलामे नौ गोटे घायल सेहो भेल अछि।
अल-मसीरा टीवी शनिक राति उत्तरी सनाक अल-जर्राफ आवासीय क्षेत्रमे चारिटा हवाई हमला आ पूर्वी सनाक शोआब आवासीय क्षेत्रमे कतेको अन्य हवाई हमलाक सूचना देलक। प्राप्त सूचनाक अनुसार प्रांतीय राजधानी सादाक उत्तरी भागमे साँझमे नव हमला भेल, जे समूहक मुख्य गढ़ अछि। स्थानीय निवासीलोकनि बतौलनि जे सनामे भेल हमला अल-जर्राफ क्षेत्रमे हूती नियन्त्रित राज्य टेलीविजन स्टेशन लग गोला-बारूद आ रॉकेट डिपोकेँ लक्षित कयलक। प्रत्यक्षदर्शी लोकनि एहि क्षेत्रसँ उज्जर धुआँक गुच्छा उठैत आ हवाई हमलाक बाद कतेको विस्फोट देखबाक सूचना देलनि।
हूती अधिकारी ओसामा सारी सोशल मीडिया प्लेटफॉर्म एक्स पर एकटा पोस्टमे कहलनि जे अल-जर्राफ क्षेत्रमे भेल हमलासँ एयरपोर्ट रोड लग स्थित विशेष आधुनिक विश्वविद्यालयक किछु हिस्साकेँ सेहो क्षति पहुँचल अछि।
हूतीक एकटा आओर सूत्र कहलक जे हवाई हमला दूटा प्रमुख हूती नेताक घरकेँ लक्षित कयलक। जनवरीमे अमेरिकी राष्ट्रपति डोनाल्ड ट्रम्पक कार्यभार सम्हारलाक बाद “विदेशी आतंकवादी सङ्गठन”क रूपमे पुनः नामित कयलाक बाद अमेरिकी सेना द्वारा हूती केर विरुद्ध कयल गेल ई पहिल सैन्य कार्यवाही अछि।
ट्रम्प सोशल मीडिया प्लेटफॉर्म ट्रुथ सोशल पर पोस्ट कयलनि, “आतंकवादी अड्डा, नेता आ मिसाइल सुरक्षा पर हवाई हमला अमेरिकी जहाजरानी, हवाई आ नौसैनिक सम्पत्तिक रक्षा आ नौवहनक स्वतन्त्रताकेँ बहाल करबाक लेल छल।”
अमेरिकी हवाई हमलाक बाद हूती सभ जवाबी हमला करबाक धमकी देलक। हूती राजनीतिक कार्यालय अल-मसीरा टीवी द्वारा प्रसारित एकटा बयानमे कहलक जे एहि आक्रामणक जवाब देल जायत।
