अमेरिकामे राष्ट्रपति डॉनल्ड ट्रंप शिक्षा विभागकेँ समाप्त कऽ देलनि। स्कूलक बच्चा सभक संग बैसि राष्ट्रपति ट्रंप बृहस्पतिकेँ कार्यकारी आदेश पर हस्ताक्षर कयलनि। एकटा विशेष कार्यक्रमक आयोजन कएल गेल छल। एहिमे राष्ट्रपतिक दुनू दिसि बच्चा सभ बैसल छल। ओ सभ ट्रंपक अनुकरण कऽ रहल छल। जखनि ट्रंप हस्ताक्षर करबाक लेल अपन मार्कर केर कैप खोललाह, तँ बच्चा सभ सेहो तहिना कयलक। हस्ताक्षर करबाक बाद ट्रंप कागजकेँ कैमरा दिस देखाबैत अपन हाथमे उठेलनि, तँ बच्चा सभ सेहो अपन-अपन हाथमे कागज देखेलक। अमेरिकी संसदक मंजूरी बिना ट्रंप एहि कार्यकारी आदेश पर हस्ताक्षर कएलनि, जकर विपक्षी दल विरोध कऽ रहल अछि।
कार्यकारी आदेश पर हस्ताक्षर करबाक पहिने डॉनल्ड ट्रंप कहला जे हमर सरकार शिक्षा विभागकेँ बंद करबाक लेल सभ जरूरी डेग उठाओत। हम एकरा जतबा जल्दी संभव होय बंद करब, किएक तँ एकरासँ किछु लाभ नहि भ’ रहल अछि। ट्रंप कहला जे ई थोड़ेक अजीब लागैत अछि जे हम शिक्षा विभागकेँ समाप्त क’ रहल छी मुदा ई सही डेग अछि। डेमोक्रेट्स सेहो जानैत छथि जे ई सही डेग अछि।
ओ शिक्षा विभागक सचिव लिंडा मैकमोहनकेँ विभागकेँ बंद करबाक लेल आवश्यक कदम उठैबाक लेल कहलनि। ओ एहि कार्यक्रमक दौरान पहिल पंक्तिमे बैसल छलीह आ ट्रंप जखनि कागज पर हस्ताक्षर करलनि तँ मुस्कुराइत छलीह। हालांकि, डेमोक्रेट्स ट्रंपक एहि निर्णयसँ खुश नहि अछि। सीनेटक माइनॉरिटी नेता चक शूमर सोशल मीडिया पर लिखलनि जे शिक्षा विभागकेँ समाप्त करबाक प्रयास डॉनल्ड ट्रंपक सभसँ विनाशकारी डेग सभमे सँ एक अछि। ई निर्णय छात्र लोकनिक लेल हानि पहुँचाएत।
हालाँकि, ट्रंपक हस्ताक्षर संगहि शिक्षा विभाग खत्म नहि होएत। एकरा लेल संसदक मंजूरी आवश्यक होएत। ट्रंपकेँ भरोसा अछि जे ओ संसदसँ एकरा पास करा लेब।
जनतब जे साल 1979 मे अमेरिकाक संघीय सरकार शिक्षा विभागक स्थापना कएल छल। ओहि समय जिमी कार्टर देशक राष्ट्रपति छलथि। एहि विभागक उद्देश्य शिक्षासँ जुड़ल तमाम सरकारी प्रयासकेँ एकहि एजेंसीक अधीन लेनाइ छल। तथापि, ई विभाग सीधे विद्यालयक सिलेबस निर्धारित नहिं करैत छल। बल्कि शिक्षासँ जुड़ल आंकड़ा संग्रह करैत छल। शोध कार्यक बढ़ावा दैत छल। संघीय सहायता वितरित करैत छल आ भेदभाव विरोधी कानूनक प्रवर्तन करैत छल।
जखन ई विभाग बनल छल, ओहि समय रिपब्लिकन नेता सभ ई विभागक विरोध कयने छल। हुनक तर्क छल जे ई राज्य आ स्थानीय विद्यालय बोर्डसँ हुनक शक्ति छीनत। आब तऽ रिपब्लिकन पार्टीक सरकार अछि। आ राष्ट्रपति ट्रंप अपन चुनावी वादामे एहि विभागकेँ खत्म करबाक जिम्मेदारी लेलनि, जकरा भली भाँति पूरा करवाक प्रयास जारी अछि।
