महाकुंभमे भक्ति आ अध्यात्मक अद्भुत संगम : पीएम मोदी
प्रयागराज
*
तिला संक्रांतिक अवसर पर मंगलदिन प्रयागराजमे लाखो श्रद्धालु पवित्र स्नान कयलनि। महाकुम्भ नगरमे ‘अमृत स्नान’क क्रममे पूरा क्षेत्रमे ‘जय श्री राम’, ‘हर हर गंगे’ आ ‘बम बम भोले’क नारा गूंजि उठल। प्रधानमंत्री नरेन्द्र मोदी रवि दिन मकर संक्रांतिक अवसर पर महाकुंभमे पहिल ‘अमृत स्नान’मे भाग लेनिहार सभ श्रद्धालुकेँ बधाई देलनि। संगहि ओ सोशल मीडिया प्लेटफॉर्म पर महाकुंभक किछु फोटो सेहो शेयर केलनि।
पीएम मोदी सोशल मीडिया प्लेटफॉर्म एक्स पर लिखलनि, “महाकुंभमे भक्ति आ आध्यात्मिकताक एकटा अद्भुत संगम ! मकर संक्रांति केर अवसर पर महाकुंभमे पहिल अमृत स्नानमे शामिल सभ भक्तकेँ हार्दिक बधाई।”
उत्तर प्रदेशक मुख्यमंत्री योगी आदित्यनाथ सेहो सोशल मीडिया प्लेटफॉर्म एक्स पर पोस्ट कयलनि, “ई हमर शाश्वत संस्कृति आ आस्थाक जीवन्त रूप अछि। आइ लोक आस्थाक महान पर्व ‘मकर संक्रांति’क पावन अवसर पर महाकुंभ-२०२५ मे प्रयागराजक त्रिवेणी संगममे पहिल ‘अमृत स्नान’ लऽ कऽ पुण्य अर्जित कयनिहार सभ भक्त लोकनिकेँ बधाई !”
ओतहि एकटा आओर पोस्टमे सीएम योगी लिखलनि, “आस्थाक महासिंधु-एकताक महाकुंभ, मकर संक्रांतिक पावन अवसर पर तीर्थराज प्रयागमे महाकुंभक आइ पहिल ‘अमृत स्नान’ पर सभ अखाड़ा आ घाट पर पुष्प वर्षा, सनातन संस्कृतिक वंदन, श्रद्धाक अभिनंदन आ आस्थाकेँ प्रणाम अछि।”
महाकुम्भक पहिल अमृत स्नान मकर संक्रांतिक शुभ अवसर पर प्रारम्भ भेल। संगमक त्रिवेणीक तट पर लाखो भक्त आ सन्तक अद्भुत संगम देखल गेल। भक्त लोकनि एहि ऐतिहासिक अवसर पर स्नान कयलनि आ अपन आस्थाकेँ जारी रखलनि। स्नानक बाद भक्त लोकनि घाट पर अपन देवताक पूजा कयलनि। एहि पूजामे तिलक दाना, खिचड़ी आ अन्य पूजा सामग्रीक उपयोग कयल गेल। भक्तलोकनि तिल आ खिचड़ी दान कऽ धार्मिक लाभ प्राप्त कयलनि। दानक ई क्रम पाबनिकेँ बेसी पवित्र बना देलक।
