१८म लोकसभाक पहिल सत्र शुरू भऽ गेल अछि। पहिल दिनक कार्यवाही सांसदसभकेँ शपथ देबाक सङ्ग शुरू भेल। सब सांसद पूरा तैयारीक संग संसद पहुँचलाह। ई सबके लेल बहुत खास अवसर छल। एहिमे बिहारक मिथिला क्षेत्रक किछु सांसद सभ अपन-अपन विशेषतासँ अपना तरफ सभक ध्यान आकर्षित कयलनि।
बिहारक दरभंगा लोकसभा क्षेत्रसँ भाजपा सांसद गोपालजी ठाकुर पाग पहिरने छलाह जाहिमे चारू कात कमल छल। पीयर आ केसरिया रंगक पाग बहुत सुन्दर लगैत छल। गोपालजी ठाकुर पीयर कुर्ता, पीयर-बैंगनी दोपटा आ चमकदार पायजामा पहिरने छलाह। एहि सं ओ बड्ड आकर्षक लगैत छलाह।
पुनः मधुबनी लोकसभा क्षेत्रक सांसद अशोक कुमार यादव सेहो विशेष पाग आ दोपटा पहिरने देखल गेलाह। मिथिला पेंटिंग उकेड़ल पाग आ दोपटा पर रंग-बिरंगक फूल देखल गेल। उज्जर रंगक फूलक चित्र बड्ड सुन्दर लगैत छल। एकर अतिरिक्त हुनकर चश्मा आ सदरी सेहो मेल खाइत छल आ ताहि पर कुर्ता-पायजामा सजैत छल।
लोजपा (रामविलास)क अध्यक्ष चिराग पासवानक एकटा अलगे अंदाज छल। चिराग पासवान सदनक सदस्यक रूपमे शपथ लेबाक लेल उज्जर कुर्ता आ बैंगनी जीन्स पहिरने पहुँचलाह। संगहि, हुनक माथ पर तिलक सेहो छल। चिराग पासवान कतेको लोकक ध्यान आकर्षित कयलनि। एहिसँ पहिने ओ एहिना अद्वितीय शैलीमे मंत्रीक शपथ लेबाक लेल राष्ट्रपति भवन पहुँचल छलथि। तखनो चिराग पासवान अपन माथ पर तिलक लगेने छलाह।
तहिना शाम्भवी चौधरी आइ संसदमे हावी रहलीह। पुरा शपथ ई बिना पर्ची देखने पूर्ण कॉन्फिडेंससँ बजलीह। लोजपा (राम विलास) केर टिकट पर समस्तीपुर लोकसभा सीटसँ जीतल शांभवी चौधरी अपन एक्स हैंडल पर शपथ ग्रहणक वीडियो सेहो साझा कयलनि। वीडियोमे देखल जा सकैत अछि जे शपथग्रहणक क्रममे शाम्भवी पूर्ण आत्मविश्वासी छथि। शाम्भवी बिना पर्चा पढ़ने पूरा शपथ लेलनि। शाम्भवी चौधरी समस्तीपुर लोकसभा सीटसँ जीतलीह। ओ कांग्रेसक सन्नी हजारीकेँ १,८७,२५१ मतक अन्तरसँ पराजित कयलनि। परिणाम साफ देखबैत अछि जे समस्तीपुर सीट पर शाम्भवी चौधरीक नामक डंका बजि रहल अछि। संगहि आइ ओ संसद भवनमे सेहो अपन छाप छोड़लनि।
शपथ लेलाक बाद सांसद शांभवी चौधरी कहलनि, “संसदमे महिला आ युवाक लेल आवाज उठौनाइ हमर प्राथमिकता होयत, हम हुनका लोकनिक लेल एकटा मजबूत आवाज बनबाक प्रयास करब आ समस्तीपुरक लोकक माँग पूरा करब।
