संसदक बजट सत्रसँ पहिने सरकार द्वारा बजाओल गेल सर्वदलीय बैठकमे एनडीए केर सहयोगी जदयू केर संजय झा आ लोक जनशक्ति पार्टी (रामविलास) केर केंद्रीय मंत्री चिराग पासवान बिहारकेँ विशेष राज्यक दर्जा देबाक मांग कयलनि।
जेडीयू कहलक जे जँ विशेष राज्यक दर्जा देबामे कोनो समस्या अछि तऽ बिहारकेँ विशेष पैकेज देल जाए। विपक्षी राजद सेहो बिहारकेँ विशेष राज्यक दर्जा देबाक माँग कयलक। वाईएसआर कांग्रेस आन्ध्र प्रदेशमे कानून आ व्यवस्थाक मुद्दा उठौलक आ राज्यमे राष्ट्रपति शासन लागू करबाक आ राज्यकेँ विशेष राज्यक दर्जा देबाक माँग कयलक। बीजू जनता दल सर्वदलीय बैसारमे ओडिशाकेँ विशेष राज्यक दर्जाक मुद्दा उठौलक।
जेडीयू बिहारमे लगातार आबयवाला बाढ़िक मुद्दा उठौलक आ भारत सरकारसँ एहि पर कारवाई करबाक आ पड़ोसी देश नेपालसँ सेहो गप्प करबाक माँग कयलक। कांग्रेस सर्वदलीय बैसारमे लोकसभामे उपाध्यक्ष बनयबाक आ ई पद विपक्षकेँ देबाक माँग कयलक। कांग्रेस सदनमे नीट मुद्दा पर चर्चाक सेहो माँग कयलक।
कांग्रेससँ गौरव गोगोई, आपसँ संजय सिंह, सपासँ रामगोपाल यादव, एआईएमआईएम आ वाम दलसँ असदुद्दीन ओवैसी सहित कतेको राजनीतिक दलक नेता कांवड़ यात्राक दौरान योगी सरकारक ‘नेम प्लेट’ लगयबाक निर्णय बैठकमे उठौलनि। बीजद सर्वदलीय बैसारमे ओडिशामे आ आन्ध्र प्रदेशमे वाईएसआर कांग्रेस कानून व्यवस्थाक मुद्दा सेहो उठौलक।
सर्वदलीय बैसारसँ बाहर अयलाक बाद एनसीपी (अजित पवार) गुटक सांसद प्रफुल्ल पटेल मीडियासँ बातचीत करैत उत्तर प्रदेशक योगी आदित्यनाथ सरकारसँ नेम प्लेटक सम्बन्धमे कयल गेल निर्णय वापिस लेबाक माँग कयलनि।
