अहमदाबाद पुलिस केर द्वारा जारी आंकड़ाक अनुसारे काल्हि समाचार सम्प्रेषण धरि एहि दुर्घटनामे कुल 265 लोकक जान जा चुकल अछि। विमानमे 242 यात्री छल, जाहिमे 241 यात्रीक मौत भऽ गेल। बाकी लोक जे अपन जान गंवा चुकल छथि ओ अहमदाबादक मेघनानीगर इलाकामे स्थित बी.जे.मेडिकल कॉलेज आओर सिविल अस्पताल कैंपससँ जुड़ल लोक छथि।
जनतब देब जे एयर इंडियाक बोइंग 787 ड्रीमलाइनर काल्हि दुपहरिया 01:40 बजे हवाई अड्डासँ महज तीन किलोमीटर दूर दुर्घटनाग्रस्त भऽ गेल । ई दुर्घटना उड़लाक लगभग दू मिनटक भीतर घटित भऽ गेल।
पुलिस उपायुक्त कानन देसाई पत्रकारसँ बातचीतमे एहि बातक पुष्टि कयलथि जे “हमरा जे जनतब भेटल अछि ओकर अनुसार 265 शव अस्पताल पहुंचल अछि।” घटनाक समय विमानमे कुल 242 यात्री आ चालक दलक सदस्य छल। मुदा, विमानकेँ खसलासँ सिर्फ यात्री नहि, अस्पताल परिसरक आवासीय क्वार्टरमे रहय वला लोक सेहो प्रभावित भेल। एही करणसँ मृतकक संख्यामे भारी बढ़ोत्तरी भेलै आ आधिकारिक तौर पर मृतकक संख्या एखनि जारी नहिं कयल गेल अछि। बहुत शवक डीएनए पहिचानक प्रक्रिया जारी अछि। सिविल अस्पतालमे शवक पहिचान आ पोस्टमार्टमक प्रक्रिया लगातार चलि रहल अछि। अस्पताल प्रशासनक अनुसार 1000 सँ बेसी डीएनए सैंपल लेल जा रहल अछि ताकि शवक सही पहिचान भऽ सकय।
