एआईएमआईएमक नेता लोकनि जनतब देलनि अछि जे पार्टी बिहार राज्यमे कुल ९ सीट पर चुनाव लड़बाक निर्णय लेलक अछि। एहि सभ सीटक सूची सेहो जारी कयल गेल। ओहिमेसँ किछु पर उम्मीदवारक चयन कएल गेल अछि।
लोकसभा चुनाव २०२४क तेसर चरणक तैयारी चलि रहल अछि। एहि चुनावमे कुल ४० लोकसभा सीट वाला राज्य बिहार महत्वपूर्ण भूमिका निभाबय जा रहल अछि। एहनमे असदुद्दीन ओवैसी केर पार्टी एआईएमआईएम सेहो बिहारमे अपन किस्मत आजमा रहल अछि। राज्य सचिव आफताब अहमद पार्टीक बिहार इकाईक प्रमुख अख्तरुल ईमानक उपस्थितिमे सीटक नामक घोषणा कयलनि। ओ बतौलनि अछि जे एआईएमआईएम बिहारमे कुल ९ सीट पर चुनाव लड़य जा रहल अछि।
एआईएमआईएम नेता लोकनि कहलनि अछि जे पार्टी शिवहर, गोपालगंज, पाटलिपुत्र, महाराजगंज, मुजफ्फरपुर, मधुबनी, जहानाबाद, कराकाट, वाल्मीकि नगर वा मोतिहारीमे ताकतक संग चुनाव लड़त।
किछु सीटक लेल उम्मीदवारक चयन कयल गेल अछि जखन कि किछु सीटक लेल शेष अछि। आफताब अहमद कहलनि जे एआईएमआईएम पार्टी अगिला चारि चरणक चुनावमे अपन उम्मीदवार मजबूतीसँ ठाढ़ करत।
एआईएमआईएम नेता राजद सुप्रीमो लालू प्रसाद यादव पर निशाना साधैत कहलनि जे राजद मुस्लिम यादव समीकरणक बात करैत अछि मुदा मात्र दूटा मुसलमानकेँ टिकट देल गेल। अख्तरुल ईमान कहलनि जे हम राजदक प्रति उदारता देखाबैत दू सीट अररिया आ कटिहार पर अपन उम्मीदवार नहिं उतारलहुं, मुदा भाजपा हमर गर्दन काटय चाहैत अछि आ राजद हमरा गुलामक रूपमे राखय चाहैत अछि। ओ कहलनि जे पार्टी जतय जरूरत पड़त चुनाव लड़त, किएक तँ हम राजद जकाँ दोहरा राजनीति नहिं करैत छी। ईमान कहलनि जे जँ राजद भाजपाक खिलाफ अछि तऽ ओकरा जतयसँ हम चुनाव लड़ि रहल छी ओतएसँ अपन उम्मीदवार वापस लेबाक चाही। ओतहि ओ किशनगंज सीटसँ चुनाव जीतबाक दावा कयने छथि।
लोकसभा चुनाव २०२४ केर अन्तर्गत पहिल चरणक चुनाव १९ अप्रैल (१०२ सीट) केँ पूरा भऽ चुकल अछि आ दोसर चरणक चुनाव २६ अप्रैल (८८ सीट) केँ पूरा भऽ गेल अछि। आब तेसर चरणक चुनाव ७ मई, २०२४ केँ होयत। तेसर चरणमे कुल ९४ सीटक लेल मतदान होयत। आयोग द्वारा एहि सभ सीटक परिणाम ४ जूनकेँ एक सङ्ग जारी कयल जायत।
