दिल्लीमे फरवरीमे विधानसभा चुनाव हेबाक अछि। एम्हर सभ राजनीतिक दल जनमानसकेँ आकर्षित करबाक लेल अपन वचन दऽ रहल अछि। कांग्रेस पार्टी एहि अवसर पर दिल्लीवासी लेल “जीवन रक्षा योजना” शुरू कयलक अछि। एहि योजनाक अन्तर्गत दिल्लीक प्रत्येक नागरिककेँ २५ लाख टाकाक स्वास्थ्य बीमा भेटत, जाहिसँ २५ लाख रुपया धरि निःशुल्क उपचार भेटत। एहिसँ पहिने कांग्रेस महिला सभक लेल “प्यारी दीदी योजना”क घोषणा सेहो कयने छल, जकर अन्तर्गत महिलासभकेँ २५०० रुपैया प्रति मास आर्थिक सहायता देल जायत।
कांग्रेस नेता आ कर्नाटकक मुख्यमंत्री डीके शिवकुमार “प्यारी दीदी योजना”क घोषणा कयलनि आ कहलनि जे जँ दिल्लीमे कांग्रेसक सरकार बनैत अछि तँ एहि योजनाकेँ पहिल कैबिनेट बैसारमे मंजूरी देल जायत। ओ आश्वासन देलनि जे ई योजना कर्नाटक जकाँ सफल होयत। शिवकुमार कहलनि जे कर्नाटकक महिलासभकेँ एहि योजनाक लाभ भेटि रहल अछि, आ एकरा दिल्लीमे सेहो लागू कयल जायत।
कांग्रेस सोशल मीडिया पर एकरा दिल्लीक महिला सभक लेल एकटा पैघ उपहार कहलक। पार्टी कहलक जे जहिना कर्नाटकमे वादा पूरा भेल, तहिना दिल्लीमे सेहो कयल जायत। जँ कांग्रेस सत्तामे आबि जायत तऽ हर महिलाकेँ 2500 रुपया महीना भेटत।
शिवकुमार इहो कहलनि जे हुनकर योजनाक नकल भाजपा आन राज्यमे कऽ रहल अछि। एहिसँ पहिने आम आदमी पार्टी सेहो “महिला सम्मान योजना”क अन्तर्गत चुनाव जीतला पर महिलासभकेँ २१०० रुपया प्रति महिना देबाक वचन देने छल आ एकरा लेल पंजीकरण प्रक्रिया शुरू कऽ देलक अछि।
